Таниқли журналист Абдукарим Мирзаев қамоққа олинди

Таниқли журналист Абдукарим Мирзаев Туркияда қамоққа олинди. Шубҳалар исботини топмади, бироқ журналистни депортация қилиш тўғрисида қарор қабул қилинди. Бу ҳақда «Газета.uz» хабар берди.

Кадр: YouTube

Маълум қилинишича, Кастамону университети Коммуникациялар факультети журналистика бўлими магистранти ва журналист Абдукарим Мирзаев 11 декабрь куни турк полицияси томонидан қўлга олинган. Журналистни ҳуқуқий жиҳатдан ҳимоя қилиш учун ёлланган адвокат вазиятни ўргангач, кимдир Абдукарим Мирзаевга тегишли рақам орқали шубҳали шахслар билан мулоқотда бўлгани ҳақида хабар бергани, ушбу маълумот ортидан журналист кузатилиб, сўнгра қўлга олинганини аниқлаган.

Абдукарим Мирзаевнинг турмуш ўртоғи эса, охирги вақтлар, айниқса сўнгги икки-уч ойда кўрсатувлари интернетда катта қизиқиш билан кузатилаётган журналистга нафақат Ўзбекистон, балки дунёнинг кўпгина давлатларидан мухлислари қўнғироқ қилиб, хурматини билдиргани, айримлари оилавий муаммоларини айтиб, ундан маслаҳат сўраганини таъкидлаган. Бундай вазиятда қўнғироқ қилувчи шахснинг кимлиги, мақсадларини аниқлаш, умуман, вазиятни назорат қилиш мутлақо имконсиз эканини айтган.

Бундан ташқари, 28 ноябрь куни кундузги 12:20—13:30 лар оралиғида оилавий дам олиш ва видеолавҳа тасвирга олиш мақсадида Истанбулнинг Мармара денгизи ёқасидаги Флориа соҳилига чиққанида замонавий кийинган  тўрт аёл (икки нафари 35−40, икки нафари 16−17 ёшларда) улардан телефон қилиб олишни сўрагани, шундан кейин Абдукарим Мирзаевнинг телефонига турли рақамлардан эркаклар қўнғироқ қилгани, СМС хабарлари ёзганини таъкидлаган. Ушбу воқеадан кейин янги олинган мобил телефони секин ишлашни, қотиб қолишни ҳам бошлаган. 10 декабрдан 11 декабрга ўтар кечаси ярим оқшомда зирҳли автомобилларда келган қуролланган ва ҳарбий либосдаги тўрт киши, шунингдек, фуқаро кийимидаги шахслар Абдукарим Мирзаевнинг уйига келиб, тинтув ўтказган. Улар уйдан ҳеч қандай шубҳали нарса топа олмаган ва қўшнилар гувоҳлигида ҳужжатларни расмийлаштириб, журналистни олиб кетган.

Кейинги куни ёлланган адвокат у билан учрашган, полицияга журналистнинг шубҳали шахслар билан ҳеч қандай алоқаси йўқлигини исботловчи далил ва ҳужжатларни тақдим этган. Шубҳа ва гумонлар ўз тасдиғини топмаганидан сўнг уни мамлакатдан депортация қилиш тўғрисида қарор чиқариб, Миграция идорасининг чет элликларни сақлаш бўлимига юборган. Айни вақтда депортация тўғрисидаги қарорни бекор қилиш, кузатувни тўхтатиш тўғрисидаги даъво тайёрланмоқда.

Шунингдек, Кастамону университети магистранти Санжар Рустамов журналистнинг на диний ва на сиёсий амбициялари йўқлигини, бор-йўғи ибратли ҳикоялар, ривоят ва асотирларни сўзлаб бериб, видеоларини ижтимоий тармоқларга жойлаб боришини таъкидлаган.

«Бунинг замирида биринчи навбатда интернетнинг ўзбек сигментини сифатли ва мазмунли видеоконтент билан тўлдириш, ахлоқий, маънавий-маърифий ҳикоялар орқали халқимиз, айниқса интернет даврида улғаётган ёш авлоднинг онгу тафаккурини юксалтириш мақсади ётибди. Қолаверса, пандемия даврида тушумлар озайган бир вақтда ушбу видеороликларни YouTube-каналга жойлаштириш орқали пул ишлаш мақсади ҳам йўқ эмас эди. Бундан бошқа ҳеч қандай манфаат, мақсад ёки ғоялар йўқ. Ҳа, дарвоқе, ҳикоя ва ривоятларнинг диний мазмун ва руҳда экани Абдукарим Мирзаевнинг оддий бир зиёли мусулмон сифатидаги танлови, холос», — деб таъкидлайди у.

Эслатиб ўтамиз, аввалроқ журналист Давронбек Толижаев ҳам номаълум сабабларга кўра унга Туркияга киришга таъқиқ қўйлилгани ҳақида ўзининг Facebook саҳифасида пост қолдирган эди.

Бундан ташқари, Эронда мухолифатчи нашр муҳаррири осиб ўлдирилгани ҳақида хабар берилган эди.