Ўзбекистонда «Pfizer» ва «BioNTech» вакцинаси билан биринчи галда кимлар эмланиши маълум қилинди
Ўзбекистонга «Pfizer» ва «BioNTech» компаниялари ишлаб чиқарган вакцина келтирилиши ҳақда хабар берилган эди. Мамлакатда ушбу вактсиналар билан биринчи галда кимлар эмланиши маълум бўлди.
Фото: Инновацион ривожланиш вазирлиги ахборот хизмати
Бу ҳақда Санитария-эпидемиологик осойишталик ва жамоат саломатлиги хизмати бошлиқ ўринбосари Ботиржон Қурбонов маълум қилган. Унинг сўзларига кўра, вакцина билан биринчи галда шифокорлар эмланади:
«Барчамизга маълум, жуда кўплаб шифокорларимиз туну-кун хизмат қилиш давомида оламдан ўтган. Шу боис ушбу вакцина билан биринчи галда коронавирус бўйича ташкил этилган махсус шифохоналар, коронавирусга гумон қилинган шахсларни кузатиш учун ташкил этилган изолятор пунктлари ёки саралаш марказларида фаолият кўрсатаётган ходимлар, шифокорларимиз эмланади.
Кейинги навбатда кексаларимиз — ушбу касалликка чалиниши эҳтимоли юқори бўлган, касалликни ёшларга нисбатан оғир ўтказадиган қарияларимиз қамраб олинади. Кексаларимизни эмлаш жараёни мажбурий бўлмайди, биринчи навбатда ъмана шу вакцинани олмоқчиманʼ, деган кўнгиллилар эмланади».
Шунингдек, у ҳозирда Тошкентдаги Вирусология илмий-текшириш институти клиникасида «Pfizer» ва «BioNTech» вакцинасини -70 даража совуқда сақлаш имконини берадиган музлатгичлар ҳозирлаб қўйилганини таъкидлаб ўтган.
«100 минг доза вакцина, албатта, бутун Ўзбекистон халқи учун етарли эмас, шунингдек, бутун Ўзбекистон учун шу 100 минг дозадан ортиқ вакцина олинмайди, дегани ҳам эмас — бу бор-йўғи биз қўйган биринчи қадам. Коронавирусга қарши вакцина ишлаб чиқаришни Ўзбекистоннинг ўзида ҳам маҳаллийлаштириш, қолаверса, давлат томонидан ажратилган маблағлар эвазига вакциналар харид қилиш ҳам режалаштирилган», — дейди Ботиржон Қурбонов.
Эслатиб ўтамиз, Ўзбекистонда COVID-19’га қарши Хитойнинг «Ayhui Zhifei Longcom Biopharmaceutical» компания вакцинаси ва Россияда ишлаб чиқарилган «Спутник V» вакцинасининг 3-босқич клиник тадқиқотлари ўтказилиши режалаштирилган.
Aввалроқ Ўзбекистон учинчи босқич синовларида ижобий натижа кўрсатган вакцинани харид қилиши ҳақида хабар берилганди. Шунингдек, Россия саноат ва савдо вазири «Спутник V» вакцинасини Ўзбекистонга олиб келгани хабар қилинган.
