Бухорода янги ўқув йилида математикага ихтисослаштирилган 4 та мактаб иш бошлайди (фото)

Бухоро вилояти халқ таълими тизимида 2020 йилда 4 та ҳудудда математика фанига ихтисослаштирилган мактаб ташкил этилади. Бу ҳақда Бухоро вилояти ҳокимлиги матбуот хизмати хабар берди.

Фото: Бухоро вилояти ҳокимлиги матбуот хизмати

Хабарда айтилишича, янги ўқув йилидан Когон шаҳридаги 17- ва Жондор туманидаги 49-ихтисослаштирилган давлат умумтаълим мактаби ҳамда Олот туманидаги 31- ва Пешку туманидаги 31-умумий ўрта таълим мактаблари негизида математика фанини чуқурлаштириб ўқитишга ихтисослаштирилган мактаблар фаолият бошлайди. Ушбу мактаблар туман ва шаҳар ҳокимлари томонидан оталиққа олинган бўлиб, айни пайтда уларни янги ўқув йилига тайёрлаш, моддий-техника базасини мустаҳкамлаш, малакали кадрлар билан таъминлаш борасида иш олиб борилмоқда.

Жумладан, Жондор туманидаги 49-ихтисослаштирилган давлат умумтаълим мактаби негизида ҳам математика фанини чуқурлаштириб ўқитишга ихтисослаштирилган мактаб ташкил этилиши кўзда тутилган. Янги ўқув йилида мазкур илм масканида математикага ихтисослаштирилган 2 та синфда 60 нафар ўқувчи қабул қилиниши режалаштирилган. Айни пайтда ҳужжатларни қабул қилиш жараёнлари олиб борилмоқда.

Фото: Бухоро вилояти ҳокимлиги матбуот хизмати

«Ахборот технологияларини ривожлантириш бошқармаси билан келишилган ҳолда мактабда IT-park филиали ҳам жойлаштириладиган бўлди. Бунинг учун учта хона ажратилиб, айни пайтда жиҳозлаш ишлари олиб борилмоқда. IT-parkда оптик толали кабеллар тортилиб, юқори тезликдаги интернет тармоғи билан ишлаш имкониятининг яратилиши ўқувчиларимизнинг ‘Бир миллион ўзбек дастурчиси’ лойиҳаларида иштирок этиб, дастурлаш йўналишида ҳам ўз билим ва иқтидорларини ривожлантиришларида муҳим омил бўлади», — деди мактаб директори Вали Сулаймонов.

Фото: Бухоро вилояти ҳокимлиги матбуот хизмати

Шунингдек, Олот туманидаги 17-умумтаълим мактаби негизида ҳам математикага ихтисослаштирилган мактаб ташкил этилиши режалаштирилган. Ўтган ўқув йилидан Олот иқтисодиёт коллежи биносида фаолият юритаётган мактаб айни пайтда тўлиқ таъмирланган ва моддий-техник базаси билан таъминланган. Янги ўқув йилида мактаб математикага ихтисослаштирилган 1 та синфда 30 нафар ўқувчи қабул қилишни режалаштирган. Айни пайтда ўқиш истагини билдириб, ҳужжат топширган ўқувчилар сони 65 нафарни ташкил этмоқда. Ихтисослаштирилган синфга ўқувчилар тест синовлари асосида қаубл қилинади.

Фото: Бухоро вилояти ҳокимлиги матбуот хизмати

Маълумот ўрнида, Президентнинг 2020 йил 7 майдаги «Математика соҳасидаги таълим сифатини ошириш ва илмий-тадқиқотларни ривожлантириш чора-тадбирлари тўғрисида»ги қарори ижросини таъминлаш мақсадида 2020-2023 йиллар мобайнида ҳар бир туман шаҳарларда биттадан математика фанини чуқурлаштириб ўқитишга ихтисослаштирилган мактабларни ташкил этиш режалаштирилган.

Аввалроқ Андижоннинг ҳар бир туманида биттадан мактабларда АКТ хоналари ташкил этилгани ҳамда Олимпия захиралари мактаб-интернатлари негизида олимпия захиралари коллежлари ташкил этилиши ҳақида хабар берилганди.