Москвада ҳукуматнинг алоқасини таъминлайдиган кабелни ўғирлаган 4 нафар ўзбекистонлик қўлга олинди

Москвада Федераль қўриқлаш хизмати (ФҚХ) махсус алоқасига тегишли кабель симини ўғирлаган 4 нафар Ўзбекистон фуқароси қўлга олинди. Бу ҳақда «Комсомольская правда» нашри ҳуқуқни муҳофақа қилиш органлари манбасига таяниб хабар қилди.

Россия ФҚХ муҳандислари ҳукумат ва мамлакат президентининг алоқаларини таъминлашга ихтисослашган кабель линияларининг бирида узилиш бўлганини қайд этган. Шу заҳоти полицияга хабар берилган.

Тез орада кабель линияси кесилгани ва ўғирлангани аниқланган. Жиноятчилар ўғирланган кабелни автомобилга ортаётганида қўлга олинган.

Нашр берган маълумотларга кўра, қўлга олинган тўрт нафар эркакнинг барчаси 24 ёшдан 32 ёшгача бўлган Ўзбекистон фуқаролари. Улардан икки нафари канализацияга тушиб, 200 метрдан узун кабелни ўғирлаган.

Жиноятчилар томонидан етказилган зарар 168,7 минг рубль (2287 доллар) деб баҳоланган.