Ўзбекистонда сўнгги 4 йилда энергетика соҳаси билан боғлиқ муаммолар нега бартараф этилмагани маълум бўлди

Энергетика вазири Алишер Султонов 21 ноябрь куни «Alter Egо» YouTube каналига берган интервьюсида Ўзбекистонда сўнгги 4 йил давомида электр энергияси ҳамда газ билан боғлиқ муаммолар нимага бартараф этилмаганини маълум қилди.

Унинг сўзларига кўра, Ўзбекистонда газ ҳамда электр энергияси билан боғлиқ содир бўлган муаммоларни бартараф этиш қийин. Шунингдек, 1 дона сим ёғочни ўрнатиш учун 3 йил вақт кераклиги айтилган.

«Сиз Россиянинг янгиликлар каналини кузатиб борасизми? Бу – жонсиз темир. Мен ишонаманки, кеча ва ундан олдинги кунда кузатилган совуқда сизнинг машинангизни ҳам юрғизиш қийин бўлган. Барча содир бўлган авариялар шундай ҳолатки, сизни ваҳимага солишга мажбур қилиб қўяди. Муҳими бу ҳолатларда саросимага тушмай, уни бартараф этиш ва қайта тиклаш керак.

Мен авария билан боғлиқ муаммоларни яхши ҳолат деб айтолмайман. Биз содир бўлган авария ҳолатларини тўғрилашга ҳаракат қиламиз. Шунингдек, нима сабабдан бўлганини ва буни ким қилганини аниқлаймиз. Мўъжизалар содир бўлмайди. Бу жонсиз темир билан боғлиқ содир бўлган барча авариялар ҳеч қачон тўхтамайди.

Биз бугун бу ҳолатни яхшиладик. Лекин нима учун бу ҳолат 4 йил давомида яхшиланмади деган савол туғилиши мумкин. Шуни тушунишимиз керак, бир дона сим ёғоч 3 йил давомида қурилади. Бизда бор барча сим ёғочлар совет давридан қолиб кетган. Биз бу сим ёғочларни қўлимиздан келганча таъмирлашга ҳаракат қиляпмиз», — дейди Энергетика вазири Алишер Султонов «Alter Ego»га берган интервьюсида.

Аввалроқ Ўзбекистонда электр таъминотидаги узилишларнинг асосий сабаблари маълум қилингани ҳақида хабар берилганди. Шунингдек, Фарғона водийсидаги энергия муаммосини ўрганиш учун Сенат ишчи гуруҳи тузилгани ҳақида хабар берилган.