Қашқадарёда карантин чекловларига ўзгартиришлар киритилди

Вилоят махсус комиссияси қарори билан Қашқадарёда карантин чекловларига ўзгартиришлар киритилди.

Маълум қилинишича, вилоятда коронавирус инфекцияси тарқалишининг олдини олиш, пандемиянинг таъсирини юмшатиш ва озиқ-овқат хавфсизлигини таъминлаш комиссиянинг 2020 йил 25 июлдаги 293-сонли йиғилиш баёни билан жорий қилинган чекловларга 3 августдан бошлаб туман (шаҳар) ҳокимлари, ҳудудий махсус комиссия раисларига қуйидаги ваколатлар берилади:

ўз ҳудудидаги буюм ва қурилиш моллари бозорлари, савдо, маиший хизмат, умумий овқатланиш фаолияти билан шуғулланувчи тадбиркорлик субъектларига фаолиятларини давом эттиришга индивидуал тарзда рухсат бериш (олдиндан тадбиркорга карантин талабларини тушунтириш ва кафолатини олиш орқали);

бунда деҳқон, қурилиш бозорлари, озиқ-овқат ва ноозиқ-овқат савдо нуқталари (супермаркет ва бошқа йирик дўконлар, буюм бозорлари), сартарошхона ва гўзаллик салонларига кириш-чиқиш жойларини пирометрлар ва антисептик воситалар билан жиҳозлаш ҳамда ҳар бир фуқаронинг тана ҳароратини ўлчашни ташкил қилган ҳолда ишлаш кафолати олинади ҳамда жиддий назоарт қилинади.

карантин талаблари ва чекловларига риоя этмаётган ташкилот ва муассасалар, савдо ва маиший хизмат объектларини белгиланган тартибда ҳудудий махсус комиссия қарори асосида, тўхтатиш;

хизмат кўрсатувчи ходимларнинг шахсий ҳимоя воситалари (тиббий ниқоб ва тиббий қўлқоп)дан фойдаланишини ва ижтимоий масофани (2 метр) сақлаган ҳолда хизмат кўрсатиш;

эпедимиологик ҳолатдан келиб чиқиб, жорий қилинган карантин талабларини юмшатиш (постларни камайтириш, аниқ вақт учун чеклов ўрнатиш ва бошқалар)ни босқичма-босқич амалга ошириш;

дезинфекция тадбирларига бирламчи тиббий билимга эга бўлган ишсиз фуқароларни, жамоат ишлари жамғармаси маблағлари ҳисобидан шартнома асосида ишга қабул қилишни ташкил қилиш.

Шунингдек, вилоят Ички ишлар бошқармаси, вилоят Давлат солиқ бошқармаси, вилоят санитария-эпидемиологик осойишталик маркази, туман (шаҳар)лар ҳокимлари қуйидаги назорат ишларини олиб боради:

тадбиркорлар томонидан савдо мажмуалари ва дўконларда санитария-гигиена талабларини бузган сотувчиларга Маъмурий жавобгарлик тўғрисидаги кодекснинг 54-моддасига (Эпидемияларга қарши кураш қоидаларини бузиш) мувофиқ жавобгарликка тортилиши бўйича тушунтириш ва тарғибот ишларини олиб бориш;

озиқ-овқат, дори-дармон, тиббий буюм ва воситалар, шунингдек, биринчи навбатдаги зарур маҳсулотларнинг нархларини асоссиз равишда кўтарилишининг олдини олиш чораларини кўриш.

Соғлиқни сақлаш вазирлиги маълумотларига кўра, 30 июль соат 23:30 ҳолатига кўра, Қашқадарё вилоятида коронавирус билан касалланганлар сони 676 нафарни ташкил этмоқда. Шулардан 453 нафари соғайган. Вилоятда 4 киши коронавирусдан вафот этган.

Эслатиб ўтамиз, аввалроқ Қаршига кириш-чиқиш 15 августгача тўхтатилиб, ҳудудда транспорт ҳаракати чекланган эди.