O‘zbekistonda OTMlarga kirish uchun qariyb 1,5 million nafar abituriyent ro‘yxatdan o‘tdi
O‘zbekistonda 2020/2021-o‘quv yili uchun oliy ta’lim muassasalarining bakalavriat ta’lim yo‘nalishlariga abituriyentlarni onlayn ro‘yxatga olish rasman yakunlandi. Bu haqida Davlat test markazi xabar berdi.
Ma’lumotlarga ko‘ra, ro‘yxatdan o‘tgan jami abituriyentlar 1 484 085 nafarni tashkil etdi. Shundan 536 144 nafarini 2020-yil bitiruvchilari tashkil etdi. Shundan ta’lim shakli bo‘yicha:
- kunduzgi ta’lim shakli — 798 608 nafar;
- sirtqi ta’lim shakli — 648 733 nafar;
- kechki ta’lim shakli — 36 744 nafar.
Tillar kesimida:
- o‘zbek tili — 1 297 445 nafar;
- rus tili — 139 115 nafar;
- qoraqalpoq tili — 44 279 nafar;
- boshqa tillar — 3 246 nafar.
Eslatib o‘amiz, ro‘yxatga olish 20-iyundan 20-iyulga qadar barcha hududlarda Davlat test markazining rasmiy veb-sayti va Yagona interaktiv davlat xizmatlari portali orqali, respublikaning 8 ta tumanida esa Davlat xizmatlari markazlari orqali amalga oshirildi.
Avvalroq O‘zbekistonda OTMlarga kirish uchun ro‘yxatdan o‘tgan abituriyentlar soni 15-iyul 18:00 holatiga ko‘ra 1 011 660 nafarni tashkil etgani haqida xabar berilgan edi.
