Ўзбекистонда олий ўқув юртлари ва техникумларга ҳужжатлар қабули бошланди

Олий ўқув юртлари бакалавриатига қабул жараёни икки босқичда ўтказилади

Ўзбекистонда 5 июндан олий ва профессионал таълим муассасаларига ҳужжатлар қабули бошланди, деб хабар бермоқда Олий таълим вазирлиги матбуот хизмати.

Президентнинг ПФ-81-сон Фармонига мувофиқ, олийгоҳлар бакалавриатига қабул жараёни икки босқичда — «аввал тест, сўнг танлов» тамойилига мувофиқ амалга оширилади.

1-босқичда абитуриентлар ҳар йили 5-июндан 25-июнга қадар (шу куни ҳам) тест синови топшириш учун my.uzbmb.uz сайтида онлайн рўйхатдан ўтади ҳамда қуйидагиларни танлайди:

Фақат тест синовида иштирок этса:

• фанлар мажмуаси;

• таълим тили;

• тест топшириш ҳудуди.

Алоҳида иқтидор талаб этиладиган таълим йўналишлари бўйича касбий/ижодий имтиҳонларда иштирок этса:

• таълим тили;

• тест топшириш ҳудуди;

• алоҳида иқтидор талаб этиладиган таълим йўналиши;

• касбий (ижодий) имтиҳон топшириладиган олийгоҳ.

Олийгоҳларга кириш имтиҳонлари июль-август ойларида ўтказилади. 2-босқичда абитуриентлар кириш имтиҳонлари тўлиқ якунланганидан сўнг 15 кун давомида my.uzbmb.uz сайти орқали қуйидагиларни танлайди:

• олий таълим муассасаси;

• бакалавриат таълим йўналиши;

• таълим шакли;

• танлов устуворлиги.

Абитуриент тест синовида тўплаган балларини имтиҳон ўтказилган куннинг эртасига билиши мумкин. Унинг талабаликка тавсия этилган ёки этилмагани қабул жараёнининг 2-босқичи тўлиқ якунлангандан кейин бир ҳафта муддатда Билимни баҳолаш агентлигининг расмий веб-сайтида эълон қилинади.

Техникумларда ўқиш истагини билдирган абитуриентлар олийгоҳларга қабулнинг якуний натижаси эълон қилинганидан сўнг 10 кун муддатда қуйидагиларни танлайди:

• техникум;

• касб ва мутахассислик;

• таълим шакли.

Натижа бир ҳафта муддатда Билимни баҳолаш агентлигининг расмий веб-сайтида эълон қилинади.