Рақобат қўмитаси UzAuto Motors компаниясига нисбатан иш очди
Рақобатни ривожлантириш ва истеъмолчилар ҳуқуқларини ҳимоя қилиш қўмитаси қонун бузилиш ҳолатлари бўйича UzAuto Motors ва «PSM-Avtosavdo» дилерига нисбатан иш қўзғатди, деб хабар қилди бошқарма.
Қўмитага ўтган йили Chevrolet Lacetti L-Style MT автомобилини сотиб олган Қорақалпоғистонда яшовчи фуқародан мурожаат келиб тушган. Аниқланишича, машина сотиб олинганидан бир неча ой ўтгач, у техник носозлик туфайли ёниб кетган.
Қўмита томонидан ушбу ҳолат (автомобилда ёнғин чиқиши) инсон ҳаёти ва унинг соғлиғига жиддий зиён етказиши мумкинлиги ҳолатларини инобатга олган ҳолда, юқорида қайд этилган автомобиль билан бир вақтда ишлаб чиқарилган 37 та айнан шу маркали (моделли, артикули) автомобилларни 10 кунлик муддатда чақиртириб олиниб, техник кўрикдан ўтказиш юзасидан бажарилиши мажбурий бўлган кўрсатма берилди, — дейилади хабарда.
Бундан ташқари, мурожаат қилган фуқарога айни шундай маркали янги автомобиль алмаштириб, ҳамда истеъмолчи талаб қўйган вақтдан бошлаб ўтказиб юборилган ҳар бир кун учун автомобиль баҳосининг 1% фоизи миқдорида пеня тўлаши тўғрисида қарор қабул қилинди.
