Олий суд Денов туманидаги фуқаронинг уйи бузиб ташлангани юзасидан изоҳ берди
Фуқаролар чорвачилик-боғдорчилик корхонасига тегишли бўлган суғориладиган қишлоқ хўжалиги ер участкасида ўзбошимчалик билан турар жой биноси ва хўжалик иморатларини қуриб олишган
Ўзбекистон Олий суди Сурхондарё вилоятининг Денов туманида турар жой биносининг бузиб ташланиши бўйича расмий баёнот билан чиқди.
Қайд этилишича, фуқаролар А. А. ва Н. Ч. «Раҳмон тараққиёт омад» чорвачилик-боғдорчилик корхонасига тегишли бўлган суғориладиган қишлоқ хўжалиги ер участкасида ўзбошимчалик билан турар жой биноси ва хўжалик иморатларини қуриб олишган.
Суд қарорига кўра, ноқонуний қурилган иншоотлар жавобгарлар ҳисобидан бузиб ташланиши, ер участкаси эса асли ҳолатига келтирилиши лозим.
Олий суд суғориладиган қишлоқ хўжалиги ерлари давлат мулки ҳисобланиши ва хусусий мулк қилиб берилиши мумкин эмаслигини тушунтирди. Судда бундай ерлар мамлакат озиқ-овқат хавфсизлиги учун стратегик аҳамиятга эга экани ва қонуннинг алоҳида ҳимоясида туриши таъкидланди.
Шунингдек, қурилиш бошлангунига қадар кадастр органлари, маҳалла ва ер тузиш хизмати вакиллари фуқароларни уларнинг ҳаракатлари ноқонуний экани ҳақида бир неча бор огоҳлантиргани қайд этилди. Бунга қарамай, қурилиш давом эттирилган.
Олий судда таъкидланишича, бузиш тўғрисидаги қарор фақат охирги чора сифатида — қоидабузарликни бартараф этишнинг бошқа усуллари натижа бермаганидан кейингина қўлланилади. Бундан ташқари, ер участкаси корхонанинг қонуний фойдаланишида бўлган, шунинг учун, суднинг фикрича, жавобгарларнинг ҳаракатлари нафақат давлат манфаатларини, балки ер эгасининг ҳуқуқларини ҳам бузган.
Алоҳида маълум қилинишича, Н. Ч. суғориладиган ер участкасини ноқонуний эгаллаб олгани учун жиноий жавобгарликка тортилган.
Суд қарори аллақачон қонуний кучга кирган бўлса-да, 2026 йил март ойида кассация инстанцияси инсонпарварлик нуқтаи назаридан унинг ижросини вақтинча тўхтатди. Олий суд маълумотларига кўра, аризачиларга йўл қўйилган қоидабузарликни ўз ихтиёри билан бартараф этишлари учун деярли икки йил вақт берилган.
Якунда Олий суд суғориладиган қишлоқ хўжалиги ерларида ўзбошимчалик билан қурилиш қилиш қонунда назарда тутилган ҳуқуқий оқибатларга олиб келишини ҳамда бундай участкалар давлатнинг алоҳида ҳимоясида эканини эслатиб ўтди.
