Андижонда профилактика инспекторини пичоқлаган шахс қўлга олинди
Андижон вилояти Хўжаобод туманида профилактика инспекторини пичоқлаб, воқеа жойидан қочиб кетган 65 ёшли гумонланувчи Й.Холбозоров қўлга олинди. Бу ҳақда ИИB матбуот хизмати хабар берди.
1 июль куни «Юксалиш» маҳалласида профилактика инспектори катта лейтенант Абдурасул Абдувалиев ўз оила аъзоларига пичоқ билан таҳдид қилаётган фуқарони зарарсизлантириш чоғида кўкрак қисмидан оғир тан жароҳати олган. Кўрсатилган ёрдамга қарамай, у шифохонага олиб кетилаётган вақтда вафот этган.
Шундан сўнг қидирувга берилган Й.Холбозоров 4 июль куни эрталаб соат 06:30 атрофида «Сўқолоқ» қабристонидаги маккапоя ичида яширинган ҳолда топилган. Қўлга олиш чоғида у ўзининг қорин қисмига пичоқ билан жароҳат етказган. Дастлабки тиббий ёрдам кўрсатилганидан сўнг шифохонага етказилган.
Мазкур ҳолат юзасидан Жиноят кодексининг 97-моддаси 2-қисми «г» банди (ўз хизмат ёки фуқаролик бурчини бажариши муносабати билан шахсни қасддан ўлдириш) бўйича жиноят иши қўзғатилди. Тергов ҳаракатлари давом этмоқда.
Ички ишлар вазирлиги гумонланувчини қўлга олишда кўмак берган фуқароларга миннатдорлик билдирди.
