Наманган ва Фарғонада ҳам халққа келган кўмирларни пуллаган шахслар ушланди

Наманган ва Фарғонада аҳолига ажратилган кўмирни талон-торож қилган омбор мудирлари ушланди.

Бош прокуратура хабарига кўра, тарқатилаётган кўмирнинг аҳолига етиб бориши юзасидан прокуратура органлари томонидан ўтказилаётган назорат тадбирларининг бирида «Кўмир таъминот» МЧЖнинг Наманган вилоят филиали тасарруфидаги Учқўрғон тумани кўмир омбор мудири У.Н. куз-қиш мавсумида аҳолига имтиёзли нархда тарқатишга мўлжалланган 623,7 тонна кўмирларни талон-торож қилгани аниқланган.

Фарғонадаги ҳолатда «Кўмир таъминот» МЧЖнинг Фарғона вилояти филиали тасарруфидаги Бувайда туман кўмир омбор мудири А.И. куз-қиш мавсумида аҳолига имтиёзли нархда тарқатишга мўлжалланган 413,8 миллион сўмлик 1364,3 тонна кўмирларни гўёки фуқаролар олгани тўғрисида сохта маълумотлар тайёрлаб, кўмирни нақд пулга сотиб, шахсий манфаатлари йўлида талон-торож қилган.

Ҳар икки ҳолат юзасидан жиноят иши қўзғатилиб, омбор мудирлари процессуал тартибда ушланган. Тергов ҳаракатлари давом этмоқда.