Саида Мирзиёева Қозоғистоннинг юқори мартабали вакиллари билан музокаралар ўтказди

Остона учрашувлари Ўзбекистон ва Қозоғистон ўртасидаги кўп қиррали стратегик ҳамкорликни янги босқичга олиб чиқиш йўлида муҳим қадам бўлди

Қозоғистоннинг пойтахти Остона шаҳрига ташриф доирасида Ўзбекистон делегацияси давлат раҳбариятининг юқори даражали вакиллари билан кетма-кет учрашувлар ўтказди. Муло­қотлар икки мамлакатнинг сиёсий, маданий ва технологик ҳамкорлигини янада кенгайтириш истиқболига бағишланди.

Дастурнинг бош тадбирида Қозоғистон президенти Қосим-Жомарт Тоқаев билан расмий учрашув бўлиб ўтди. Ўзбекистон президенти Шавкат Мирзиёевнинг самимий саломи ва эзгу тилаклари Тоқаевга етказилди. Томонлар икки мамлакатнинг нафақат қўшни, балки яқин дўст, ишончли стратегик ҳамкор ва иттифоқчи эканлигини алоҳида таъкидлади. Қосим-Жомарт Кемелевичга илиқ қабул ва қардошлик-биродарлик ришталарини янада мустаҳкамлашга қаратилган изчил саъй-ҳаракатлари учун миннатдорлик билдирилди.

Шунингдек, Қозоғистон Республикаси президенти Маъмурияти раҳбари Роман Скляр билан алоҳида мулоқот ўтказилди. Унда Ўзбекистон–Қозоғистон шериклик муносабатларининг ҳозирги аҳволи ва келажак ривожланиш йўналишлари кенг муҳокама қилинди. Томонлар икки давлат ўртасидаги ҳамкорликнинг устувор соҳалари бўйича фикр алмашди.

Сафар якунида Қозоғистон Республикаси Давлат маслаҳатчиси Ерлан Карин билан учрашув бўлиб ўтди. Мулоқотда узоқ муддатли стратегик шериклик асосий йўналишлари кўриб чиқилди. Айниқса, маданий дипломатия ва ёшларнинг икки мамлакатдаги ҳамжиҳатликни мустаҳкамлашдаги роли муҳокаманинг марказида бўлди. Бундан ташқари, юқори технологиялар соҳасидаги истиқболли ҳамкорлик имкониятлари ҳам атрофлича кўриб чиқилди.

Остона учрашувлари Ўзбекистон ва Қозоғистон ўртасидаги кўп қиррали стратегик ҳамкорликни янги босқичга олиб чиқиш йўлида муҳим қадам бўлди. Сиёсий диалог, маданият, ёшлар ва юқори технологиялар бўйича олиб борилган музокаралар икки давлатнинг иттифоқчилик мақомини янада мустаҳкамлади.