Қўшни давлатлардан олиб келинган наркотик моддалар мусодара қилинди
Тожикистон ва Қирғизистондан контрабанда йўли билан олиб келинган жами 8,2 кг наркотик модда мусодара қилинди. Бу ҳақда ДХХ хабар берди.
Қайд қилинишича, Сурхондарё вилояти Узун туманида яшовчи фуқаро Тожикистондан олиб кирилган 896 г гашишни Деновдаги яширин жойга олиб бораётганида қўлга олинган. Шунингдек, унинг уйидан яна 2 кг 260 гp опий моддасини ҳужжатлаштириш йўли билан олинган.
Наманган шаҳрида эса илгари судланган шахс бошқарувидаги автомобиль тўхтатилиб, кўздан кечирилганда, салон қисмида 2 кг 990 гр гашиш борлиги аниқланган. Терговгача бўлган текширувда аниқланишича, мазкур модда Қирғизистон фуқароси томонидан айланма йўллар орқали Янгиқўрғон туманига олиб кирилган ва Наманганда сотилиши режалаштирилган.
Марғилонда истиқомат қилувчи ва Тошлоқ туманида яшовчи икки фуқаро ўзаро келишиб, Тожикистондан олиб кирилган 487 гр гашишни $5 мингга сотаётган вақтида ушланган. Тошлоқ туманилик фуқаронинг уйидан 599 гр гашиш процессуал тартибда расмийлаштирилган.
Яна бир ҳолатда, Ургут туманида яшовчи, бир неча бор судланган шахс шериги билан бирга Тожикистондан олиб келинган 982 грамм опийни 8000 долларга сотаётган вақтда қўлга олинган.
Барча ҳолатлар юзасидан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланилган.
