Ҳиндистонда 90 мингга яқин аҳоли «Монта» циклони сабабли эвакуация қилинди

Ҳиндистоннинг Андхра-Прадеш ва Одиша штатларида тропик «Монта» циклон туфайли 87 мингдан ортиқ одам эвакуация қилинди. Бу ҳақда Hindustan Times нашри хабар берди.

Қайд этилишича, Бенгал кўрфазида шаклланган циклон 29 октябрь куни тонгда Ҳиндистон штатлари соҳилига етиб келган. Натижада кўплаб дарахтлар ағдарилиб, электр узатиш тармоқлари шикастланган.

Шунингдек, ўнлаб самолёт ва поезд рейслари бекор қилинган ёки йўналиши ўзгартирилган.

Андхра-Прадеш штатидан тахминан 76 минг киши, Одиша штатидан эса 11 мингдан зиёд фуқаро эвакуация қилинган. Ҳозирда, циклон оқибатларини бартараф этиш учун қўшимча техника ва қутқарувчилар жалб этилган.