Баҳодир Жалолов жамоатчилик танқидидан сўнг «Inbazar» асосчисини ҳимоя қилиш фикридан қайтди

Аввалроқ Inbazar асосчиси Омадбек Холматовни қўллаб-қувватлаган Олимпия чемпиони Баҳодир Жалолов, жамоатчилик танқидидан сўнг ўз фикрини ўзгартириб, айтган сўзлари учун узр сўради.

Маълумот учун, ижтимоий тармоқларда тарқалган биринчи видеода Жалолов Холматов қаттиққўл бўлсада, ҳеч кимга ёмонлик қилмаслигини айтган. Бироқ, жамоатчиликнинг салбий муносабатидан сўнг, спортчи янги мурожаат билан чиқди.

Жалолов ўзининг иккинчи видеосида барча керакли маълумотларга эга эмаслигини тан олиб, шошилинч хулосага келганини маълум қилди. Шунингдек, боксчи зўравонликнинг ҳар қандай кўринишини қоралаб, ҳуқуқ-тартибот идоралари қонун доирасида зарур чоралар кўришини таъкидлади.

Эслатиб ўтамиз, жамоатчилик норозилигига сабаб бўлган воқеа Inbazar ходимининг бошқа бир сотувчисини калтаклаши оқибатида юз берган.

Натижада, ходим Маъмурий жавобгарлик тўғрисидаги кодекснинг 183-моддаси (майда безорилик) билан айбдор деб топилиб, унга 7 кунлик қамоқ жазоси берилди.

Шунингдек, ушбу воқеани видеога олган йигит ҳам беш суткага ҳибсга олинди.

Бундан ташқари, ижтимоий тармоқларда Холматов иштирокидаги видеолар пайдо бўлиб, унда у ўз қўл остидагиларга таҳдид қилиб, жисмоний куч ишлатгани акс этган.

Ҳозирда, Inbazar дўконлар тармоғи асосчиси Омадбек Холматовга нисбатан терговга қадар текширув ўтказилмоқда.