Россия эълон қилган уч кунлик сулҳ кучга кирди

8 май куни Россия томонидан эълон қилинган уч кунлик сулҳ кучга кирди. Бу ҳақда Reuters хабар берди.

Қайд қилинишича, тинчлик режими Москва вақти билан соат 00:00 да (Тошкент вақти билан 02:00) кучга кирганидан сўнг Украинанинг йирик шаҳарларида, жумладан, Киевда тонг тинч ўтган. 

Хабарга кўра, Украина Ҳарбий ҳаво кучлари сулҳ бошланганидан кейин Россия самолётлари икки марта бошқариладиган бомбаларни Шимолий Украинадаги Суми вилоятига ташлагани ҳақида ҳам маълумот берган. 

Россия бу сулҳни Иккинчи жаҳон урушидаги ғалабанинг 80 йиллиги муносабати билан эълон қилган эди. 

Шунингдек, Украина ушбу сулҳга расмий равишда қўшилмаган. Президент Владимир Зеленский мамлакатининг илгари илгари сурган 30 кунлик ўт очмаслик таклифи кучда эканини эслатган.