Украина Трамп таклиф қилган сулҳ шартларига рози бўлди
Украина АҚШ томонидан илгари сурилган сулҳ таклифига рози бўлди. Бу ҳақда Доналд Трампнинг Украина бўйича махсус вакили Кит Келлог Fox News’га берган интервьюсида маълум қилди.
Келлогнинг айтишича, 23 апрель куни Украина ва Европа вакиллари билан ўтказилган учрашувда АҚШ томонидан илгари сурилган 22 шарт муҳокама қилинган ва улар бу шартларга розилик билдирган.
Гап ҳар икки томон эгаллаб турган позицияларни сақлаган ҳолда ўт очишни тўхтатиш режимини жорий этиш ҳақида кетмоқда. Унга кўра, 30 кунлик сулҳ эълон қилинади ва бу урушни вақтинча музлатишни кўзда тутади.
Келлогнинг таъкидлашича, Украина Россиянинг босиб олинган ҳудудлари устидан де-факто назоратини тан олишга тайёр, аммо бу ҳолатни расмий, яъни де-юре тан олишдан бош тортмоқда. АҚШ эса бунга жавобан Украинага Харков вилоятининг бир қисмини, Запороже АЭС ва Каховка ГЕС устидан назоратни, Днепр дарёсида эркин ҳаракатланиш ҳамда Николаев вилоятидаги Кинбурн қўлтиғи устидан назоратни қайтаришни таклиф қилмоқда.
Трамп вакилининг айтишича, томонлар ушбу келишувни аллақачон муҳокама қилган ва ҳозирда жорий чизиқлар бўйича ўт очишни тўхтатишга тайёр турибди.
