Ўзбекистон аҳолисининг аксарият қисмида маймунчечакка қарши иммунитет мавжудлиги маълум қилинди

Ўзбекистон фуқароларида маймунчечакка қарши жамоавий иммунитет шаклланган. Бу ҳақда Санитария-эпидемиология осойишталиги ва аҳоли саломатлиги қўмитаси маълум қилди.

Мамлакатимизда истиқомат қилаётган 1980 йилдан аввал туғилган катта ёшдагилар чечак (халқ тилида чин чечак) касаллигига қарши тўлиқ эмланган. Aйнан шу қатламда жамоавий иммунитет мавжуд, боиси чин чечакка қарши эмлашдан кейин ҳосил бўлган иммунитет маймун чечагига қарши ҳам ишлайди ва касалликнинг кенг тарқалиш хавфини пасайтиради, — дейилади ҳисоботда.

Шунингдек, қўмита касаллик тарқалишини олдини олиш мақсадида, ушбу эҳтиёт чораларига риоя этишни тавсия қилади:

• маймун чечаги касаллиги бўйича эпидемиологик ҳолат нохуш давлатларга сафарларни чеклаш;

• иш юзасидан хизмат сафарига борилган тақдирда, ёввойи ҳайвонлар ва кемирувчилар (маймунлар, каламушлар) билан мулоқотда бўлмаслик;

• жамоат жойларига чиқишда шахсий гигиенага қаътий риоя қилиш;

• тана ҳарорати кўтарилган ёки тошмалар тошган йўловчилар билан бирга ҳаракатланишга тўғри келганда имкон қадар санитария-муҳофаза (ижтимоий) масофани сақлаш;

• жамоат транспортларида тиббий ниқоблардан фойдаланиш, транспортдан тушгандан сўнг қўлларни зарарсизлантирувчи воситалар билан тозалаш тавсия этилади.