Европа мамлакатларида коронавирусга қарши AstraZeneca вакцинаси билан қайта эмлаш бошланди
Европа давлатлари коронавирусга қарши AstraZeneca препарати билан эмлаш қайта бошлаганини эълон қилди. Бу ҳақда «РБК»га асосланиб «Дарё» маълум қилди.
Фото: aa.com.tr
Хабарга кўра, Германия соғлиқни сақлаш федерал вазири Йенс Спан мамлакатда 19 март куни AstraZeneca билан эмлаш қайта бошланишини маълум қилган. Вазир душанбадан бери препаратни қўллаш тўхтатилгани сабабли йўқотилган тўрт куннинг ўрнини қоплаш зарурлигини айтган. У шифокор ва беморларнинг юзага келиши мумкин бўлган хатарлардан бохабар бўлишини таъкидлади.
«Фуқаролар эҳтимолий хавфдан шаффоф равишда хабардор қилинишига ишонч билдириши мумкин», — дейди Спан.
Қайд этилишича, Францияда AstraZeneca билан эмлаш 19 март куни тушдан кейин қайта бошланади. Франция бош вазири Жан Кастекс вакцинага нисбатан тўлиқ ишончни кўрсатиш учун унинг ўзи жума куни ушбу препарат билан эмланишини айтган.
Шунингдек, Италия, Испания, Болгария, Португалия ва Словения ҳам AstraZeneca билан эмлашни қайта бошлайди.
Мазкур препарат билан эмлашни тўхтатган Швеция эса ўз текширувларини давом эттирмоқда.
Эслатиб ўтамиз, аввалроқ Ўзбекистонга COVISHIELD вакцинаси олиб келинган эди.
