Нетаняху Трампни тинчлик бўйича Нобел мукофотига тавсия қилди

Исроил бош вазири Бинямин Нетаняху 7 июль куни АҚШ президенти Доналд Трампни Тинчлик бўйича Нобел мукофотига номзод қилиб кўрсатганини билдирди. Бу ҳақда The Hill хабар берди.

Нетаняхунинг сўзларига кўра, Трампнинг «Иброҳимий битимлар»ни имзолашдаги роли, Яқин Шарқдаги дипломатик алоқаларни яхшилагани ҳамда минтақавий тинчликни таъминлашга қаратилган саъй-ҳаракатлари уни мукофотга лойиқ қилади.

Нетаняху бу ҳақда АҚШга расмий ташрифи давомида, Трамп билан кечки овқат пайтида айтган.

Трамп ўз навбатида бу янгиликдан бехабар бўлганини билдирган ва Нетаняхуга миннатдорчилик изҳор қилган.

Шунингдек, Трамп номзоди бошқа давлатлар томонидан ҳам илгари сурилган. Жумладан, Покистон ҳукумати уни Ҳиндистон билан можарони юмшатишдаги воситачилик роли учун Нобелга тавсия қилган. АҚШ Конгрессининг айрим аъзолари, жумладан, Жоржия штатидан Республикачи конгрессмен Бадди Картер ҳам Нобел қўмитасига Трамп номзодини расман йўллаган.

Трамп илгари ўзи Нобел мукофотига лойиқ бўлиши мумкинлигини айтган, бироқ уни ҳеч қачон олмаслигини таъкидлаган эди.