Хориждан қайтган фуқаролар учун ОИВ бўйича мажбурий кўрик жорий қилиниши мумкин
Чет элда бўлиб келган фуқаролар ОИВ га мажбурий текширилиши мумкин. Бу қонун лойиҳаси Қонунчилик палатаси депутатлари томонидан учинчи ўқишда қабул қилиниб, Сенатга юборилди.
Ҳужжатга кўра, узлуксиз 90 кун ва ундан ортиқ вақт чет элда бўлиб қайтган 18–60 ёшдаги фуқаролар, шунингдек, Ўзбекистонга меҳнат фаолияти учун келган чет элликлар мажбурий равишда ОИВ бўйича тиббий кўрикдан ўтади.
Шунингдек, фуқаролар ва доимий яшовчи фуқаролиги бўлмаган шахслар давлат бюджети ҳисобидан, чет элликлар эса ўз ҳисобидан ёки иш берувчи маблағи эвазига текширувдан ўтказилиши назарда тутилмоқда.
Қонун лойиҳасида, шунингдек, хорижга иш излаб кетаётган фуқароларни бормоқчи бўлган давлат қонунчилиги ва яшаш қоидалари бўйича ўқитиш хусусий бандлик агентликларининг мажбуриятига айланиши кўзда тутилган.
Ташаббускорларга кўра, 90 кунлик мезон танланиши вируснинг организмда ўзини намоён қилиш муддатига боғлиқ. 2023 йилда хориждан қайтган 1,7 млн фуқародан 25% и ихтиёрий ОИВ текширувдан ўтган, шундан 1 512 нафарида ижобий натижа қайд этилган.
Депутатлар фикрича, мазкур қонун инфекциянинг тарқалишини олдини олиш, аҳоли саломатлигини муҳофаза қилиш ва миграция жараёнларида ижтимоий хавфсизликни таъминлашга хизмат қилади.
