Жанубий Корея президенти ва рафиқасининг Ўзбекистонга уч кунлик ташрифи якунланди

Жанубий Корея президенти Юн Сок Ёль ва рафиқасининг Ўзбекистонга уч кунлик ташрифи якунланди. Президент Шавкат Мирзиёев рафиқаси билан олий мартабали меҳмонларни аэропортда кузатиб қўйди, — деб хабар беради президент матбуот хизмати.

Бўлиб ўтган уч кунлик ташриф доирасида, олий даражадаги музокаралар ўтказилиб, икки томонлама стратегик шерикликни янада чуқурлаштириш ва кенгайтириш тўғрисидаги қўшма баёнотлар имзоланди.

Бундан ташқари давлат раҳбарлари Кореянинг етакчи компаниялари ва банк-молия институтлари вакиллари иштирокидаги қўшма бизнес форумида қатнашиб, Тошкентдаги Технопаркка ташриф буюришди.

Бугун эса давлат раҳбарларининг мулоқоти Самарқандда давом этди. Президентлар рафиқалари билан бирга қадим шаҳарнинг тарихий-меъморий дурдоналари билан танишдилар.

Ташриф тадбирлари якунланганидан сўнг аэропортда президент Юн Сок Ёль ва рафиқасини Ўзбекистон президенти Шавкат Мирзиёев ва рафиқаси кузатиб қўйди.