Иркутскда ўзбекистонлик сотувчи йигит супермаркетга кирган ўғриларни сақич ва қаҳва пакетлари билан ҳайдади (видео)
Россиянинг Иркутск шаҳридаги 24 соат ишлайдиган Уст-Кут супермаркетида ишлайдиган ўзбекистонлик йигит ўғриларни сақич пачкалари ва қаҳва пакетлари билан қувди. Бу ҳақда «Комсомольская правда» хабар берди.
Фото: «Комсомольская правда»
Маълум бўлишича, Иркутскда ўзбекистонлик йигит Салоҳиддин Маматқулов супермаркетда ёрдамчи ишчи бўлиб ишлайди. Тунги навбатчиликда омбордан маҳсулотларни олиб, пештахталарга жойлаган. Тонгги соат 4:00 ларда кассир бўлиб ишлайдиган қиз 5 дақиқа унинг ўрнига кассага қараб туришини сўраган. Кейин супермаркетга юзига ниқоб кийган ва қўлида пичоқ тутган икки киши кириб, унга ҳужум қилган.
Салоҳиддин дастлаб касса устидан сакраб, йўлакка қочган. Бу пайт ўғрилар кассани ўмаришга тушган. Кейин Салоҳиддин сотувга қўйилган қаҳва пакетлари ва сақич пачкаларини ўғриларга отиб, уларни ҳайдаган. Ўғрилар кассадан пул оломай, қочиб кетган.
Айтилишича, супермаркет эгаси йигитни бу қаҳрамонлиги учун 10 минг рубль (128 доллар) бонус ва қўшимча дам олиш кунлари билан мукофотлаган.
Аввалроқ Марғилонда қаровсиз қолдирилган машина ичидан телефон ўғирлаган шахс, Фарғонада корхона ишчисининг салкам 500 долларини ўғирлаб кетган шахс қўлга олингани хабар қилинган эди.
