Ўзбекистонда сўнгги 8 ойда 4 мингдан ортиқ ер участкаси онлайн аукционда сотилди
Ўзбекистонда сўнгги 8 ойда 4 мингдан ортиқ ер участкаси онлайн аукционда сотилди. Бу ҳақда Aдлия вазирлиги матбуот хизмати «Tez News»га хабар берди.
Маълум қилинишича, 1 сентябрь ҳолатига кўра 10 908 та ер участкалари аукцион савдоларига чиқарилган ва 4009 таси сотилган ҳамда 6899 таси ауцион жараёнида муҳокамада бўлиб турибди.
Қайд этилишича, Aдлия вазирлиги 3 сентябрь куни фуқаролар билан «Тадбиркорлик ва шаҳарсозлик фаолиятини амалга ошириш учун бўш турган ер участкаларини бериш тартиб-таомиллари» мавзусида онлайн мулоқот ўтказган.
Фото: Aдлия вазирлиги матбуот хизмати
Мулоқотда Aдлия вазирлигининг Ижтимоий-иқтисодий соҳада ҳуқуқни қўллаш амалиётини ўрганиш бошқармаси ходимлари иштирок этган ҳамда тадбиркорлик ва шаҳарсозлик фаолиятини амалга ошириш учун бўш турган ер участкаларини «YERELEKTRON» автоматлаштирилган ахборот тизимига жойлаштириш, онлайн аукционда жисмоний ва юридик шахсларнинг иштирок этиш шартлари ва тартиби бўйича тушунтириш беришган.
Қишлоқ хўжалигига мўлжалланмаган бўш турган ер участкалари тадбиркорлик ва шаҳарсозлик фаолиятини амалга ошириш учун доимий фойдаланишга берилиши, ер участкасини танлаш материаллари бўйича келишиш ва хулосалар бериш фақат «YERELEKTRON» AAТ орқали амалга оширилиши, аукцион натижалари тўғрисидаги баённома олди-сотди шартномаси кучига эга бўлиши ва ушбу ер участкасидан доимий фойдаланиш ҳуқуқини аукцион ғолиби номига давлат рўйхатидан ўтказиш учун асос ҳисобланиши қайд этилган.
Шунингдек, тадбиркорларга онлайн-аукцион иштирокчисига айланиш тартиби жуда осонлиги ва унда иштирок этиш учун www.e-auksion.uz сайтидан рўйхатдан ўтиши ҳамда ўзларини қизиқтирган объектни танлаши ва ариза бериши, сўнгра тўловларни тижорат банклари ёки электрон тўлов тизимлари орқали амалга ошириб, онлайн аукционда иштирок этиш имкониятига эга бўлиши эслатиб ўтилган.
Эслатиб ўтамиз, аввалроқ Бухорода ауционга қўйилган бўш ер участкалари рўйхати эълон қилинган эди.
Кейинчалик Бухорода сўнгги 7 ойда электрон ауцион орқали 2 миллиард 80 миллион сўмлик ер участкаси сотилгани ҳақида хабар берилди.
