«Ўзбекистонда қийноқ деган масала умуман кун тартибидан чиқиб кетиши керак» — Танзила Норбоева

Сенат раиси Танзила Норбоева 6 январь куни бўлиб ўтган Сенатнинг 11 ялпи мажлисида қийноқ масаласига ҳам алоҳида тўхталиб, бу масала Ўзбекистонда кун тартибидан чиқиб кетиши кераклигини таъкидлади. Бу ҳақда Сенат матбуот хизмати хабар қилди.

Фото: Сенат матбуот хизмати

Хабарга кўра, Танзила Норбоева Бош прокуротура, Ички ишлар вазирлиги, Омбудсманнинг фаолияти таҳлил қилинганда қийноқ масаласига алоҳида эътибор ва тегишли баҳо берилишини таъкидлаган:

«Республикамизда бу нарсага умуман ўрин қолиш керак эмас. Инсонга бўлган эътибор ҳозирда жуда кучлики, бунда қийноқ деган масала умуман Ўзбекистонда кун тартибидан чиқиб кетиш керак. Бош прокуротура, Ички ишлар вазирлиги, Омбудсманнинг фаолияти таҳлил қилинганда мазкур масалага алоҳида эътибор ва тегишли баҳо берилади. Мазкур қўмиталардан бу борадаги ўрганишлар таҳлилланиб янада кучайтириш талаб этилади».

Шунингдек, Танзила Норбоева 2021 йилда суд ҳокимияти мустақиллигини таъминлашга кўмаклашувчи комиссияга раислик қилиш Сенатга ўтишини маълум қилган:

«Қолаверса, жорий йилда суд ҳокимияти мустақиллигини таъминлашга кўмаклашувчи комиссиясига раислик қилиш Сенатга ўтади. Иккала палатада ҳар доим навбатма-навбат иккала палата раислик қилади. Ва бу йили биз мана шу комиссияга раислик қиламиз. Шу боис комиссия фаолиятини янада кучайтириш жорий йилда олдимизда турган энг долзарб масалалардан бири бўлиб ҳисобланади», — дейди Сенат раиси.

Эслатиб ўтамиз, Тошкент шаҳрида бўлиб ўтган матбуот анжуманида Олий Мажлис Сенати ҳамда Гендер тенгликни таъминлаш масалалари бўйича комиссияси раиси Танзила Норбоева «тарбия дарслари» доирасида болалар боғчаларидан бошлаб барча таълим муассасаларида жинсий тарбия дарслари ўтилишини маълум қилганди.