Ўзбекистонда тест синовлари вақтида гуруҳ назоратчиси парта тагига телефон ёки шу каби қурилма қўйгани ҳақидаги хабар рад этилди

Ижтимоий тармоқларда гуруҳ назоратчиси парта тагига нимадир қўйиб кетгани акс этган видео юзасидан расмий маълумот берилди. Бу ҳақда АОКАда Давлат тест маркази мутахассислари иштирокида бўлиб ўтган матбуот анжуманида хабар қилинди.

Кадр: Видео

Маълум бўлишича, мазкур ҳолат Ички ишлар вазирлиги томонидан текширилган. Бу ерда ҳеч қандай қоидабузарлик ҳолати мавжуд эмас. Мазкур ҳолатни учта камерадан олинган видеоси таҳлил қилинган. Гуруҳ назоратчиси парта тагига телефон ёки шу каби бирор қурилмани эмас, тиббий ниқобни қўйган.

Шунингдек, ҳозиргача абитуриентларга саволлар китоби ва титул варақасини адаштириб тарқатган битта назоратчи тест жараёнларидан четлаштирилган.

Эслатиб ўтамиз, Самарқандда ички кийимларга ўрнатилган яширин алоқа воситаларини абитуриентларга сотаётган шахс аниқланган.

Аввалроқ ДТМ тест синовида телефондан фойдаланган абитуриентга тегишли чора кўрилишини маълум қилинган эди. Шунингдек, кириш имтиҳонларининг биринчи кунида 6 мингдан ортиқ абитуриент тест синовига келмади, 59 нафари имтиҳондан четлаштирилганди.

Кейинчалик Қўқонда тест синовларига тақиқланган техник қурилма олиб кирмоқчи бўлган абитуриент қўлга тушгани ҳақида хабар берилди.