Самарқанддан Тошкентга йўл олган юк машиналари вақтинча Сирдарё туманини айланиб ўтади
Самарқанддан Тошкентга йўл олган юк машиналари вақтинча Сирдарё туманини айланиб ўтади. Бу ҳақда Самарқанд вилояти ички ишлар бошқармаси хабар берди.
Маълум қилинишича, Сирдарё вилояти ҳокимининг 2 сентябрда қабул қилинган қарорига кўра, Сирдарё вилоятидан ўтган М-34 Тошкент—Душанбе автомобиль йўлининг 90-километрида жойлашган шўризак коллектори устидаги темир-бетон кўприкнинг юк кўтариш қобилияти пасайгани сабабли таъмирлаш ишлари белгиланган.
Қайд этилишича, кўприкда асосан оғир юк ташувчи транспорт воситаларининг ҳаракатланиши тақиқланган.
Шу муносабат билан, М-39 автомобиль йўлининг 871-километри орқали Сирдарё вилоятига кириб келган оғир юк ташувчи транспорт воситаларининг ҳаракати 4Р26 Сирдарё—Деҳқонобод—Қиёт—Бекобод автомобиль йўли орқали амалга оширилиши ва A373 Гулистон, Бўка, Aнгрен, Қўқон ва Aндижон орқали Ўш автомобиль йўлининг 58-километрига чиқиб ҳаракатни давом эттириши мумкинлиги қайд этилган.
Қарорда Сирдарё вилояти автомобиль йўллари ҳудудий бош бошқармасига транспорт воситалари қатнови учун ушбу темир-бетон кўприкни 2 ой муддатда бир йўналишини таъмирлаб, фойдаланишга топшириш вазифаси юклатилган. Ҳамда 4 ой муддатда кўприкнинг тўлиқ фойдаланишга топширилиши белгиланган.
Эслатиб ўтамиз, аввалроқ Осиё тараққиёт банки маблағи эвазига Тошкент—Наманган йўлининг 100 километрли участкасида интеллектуал транспорт тизими ўрнатилиши ҳақида хабар берилган эди. Кейинчалик Пахтаободдаги маҳаллалардан биридаги йўлларга 2200 метрлик асфальт ётқизилиши маълум қилинди.
