Бешариқда 5 минг долларга ўқишга киритиб қўймоқчи бўлган фирибгар ушланди

Фарғона вилояти Бешариқ туманида 5 минг доллар эвазига ўқишга киритиб қўймоқчи бўлган шахс қўлга олинди. Бу ҳақда Бош прокуратура «Tez News»га хабар қилди.

Хабарга кўра, Бош прокуратура ҳузуридаги Департаментнинг Бешариқ туман бўлими ҳамда ИИБ ходимлари томонидан ўтказилган тезкор тадбирда фуқаро Ш.Т. фирибгарлик йўли билан даромад орттириш мақсадида фуқаро Н.У.нинг ишончига кирган.

Қайд этилишича, Ш.Т. юқори лавозимда ишловчи танишлари орқали Н.У.ни Қўқон Давлат педагогика институтига ўқишга киритиб қўйиш эвазига 5 минг долларни олган вақтида ашёвий далил билан ушланган.

Мазкур ҳолат юзасидан ушбу шахсга нисбатан Жиноят кодексининг 168-моддаси (Фирибгарлик) 2-қисми ва 211-моддаси (Пора бериш) билан жиноят иши қўзғатилиб, тергов ҳаракатлари ўтказилмоқда.

Эслатиб ўтамиз, Каттақўрғонда абитуриентни 8 минг доллар эвазига ўқишга киритиб қўймоқчи бўлган шахсга жиноят иши қўзғатилгани ҳамда Aндижонда 4 минг долларга эвазига ўқишга киритиб қўймоқчи бўлган ўқитувчи ушлангани ҳақида хабар қилинганди.