Конституциянинг 28 йиллиги муносабати билан 104 нафар маҳкум афв этилди
Шавкат Мирзиёев Конституция қабул қилинганлигининг 28 йиллиги муносабати билан «Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида»ги фармонни имзолади. Бу ҳақда ЎзА хабар берди.
Фармонга мувофиқ, Конституциянинг 93-моддаси 23-бандига асосан содир этган жинояти учун жазони ижро этиш муассасаларида жазо ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 104 нафар фуқаро афв этилган.
Афв этилган шахсларнинг 6 нафари асосий жазодан тўлиқ озод этилган, 50 нафари жазони ўташдан муддатидан илгари шартли озод қилинган, 17 нафарининг озодликдан маҳрум этиш жазоси енгилроқ жазо билан алмаштирилган. Шунингдек, 41 нафар шахсга тайинланган озодликдан маҳрум этиш жазосининг муддатлари қисқартирилган.
Афв этилганларнинг 13 нафарини чет эл фуқаролари, 9 нафарини 60 ёшдан ошган шахслар, 1 нафарини аёл ҳамда 21 нафарини тақиқланган ташкилотлар фаолиятида қатнашган шахслар ташкил этади.
Аввалроқ Чироқчида ИИБ ходимлари уриб ўлдирган фуқаронинг хотини суддан айбдорларни озод қилишни сўраганди. Шунингдек, Тошкент вилоятида уй қамоғидаги фуқаронинг зиёфатида қатнашган судья уни озодликка чиқарган.
