Украинада ҳам уч қиррали монолит топилди — фото

Украина пойтахти Киев шаҳрида ҳам АҚШ, Буюк Британия ва Руминиядаги каби уч қиррали монолит пайдо бўлди. Монолит суратларини Украина келажак институти таҳлилчиси Юрий Романенко ўзининг Facebook’даги саҳифасига жойлади.

Фото: Facebook/ @yuriy.romanenko

Айтилишича, Киевдаги Қалъа тоғлари тепасида сирли монолит пайдо бўлган. Расмларга қараганда, уч қиррали монолитнинг кенглиги 45 сантиметрга тенг.

Фото: Facebook/ @yuriy.romanenko

Фото: Facebook/ @yuriy.romanenko

Уни ким ва нима мақсадда ўрнатгани номаълум. Ҳозирча монолитнинг «The Most Famous Artist» (Энг машҳур рассомлар гуруҳи) томонидан ўрнатилгани тахмин қилинмоқда.

Аввалроқ гуруҳ AҚШнинг Юта штатидаги чўлдан топилган уч метрлик металл монолитни ўрнатишда гумон қилинган эди. Шундан сўнг гуруҳ уларнинг Instagram постларидан бири остидаги монолит муаллифи эканлиги ҳақидаги саволга жавоб қайтарган. Унда «Агар ‘сиз’ деганда бизни назарда тутган бўлсангиз, демак, ‘ҳа’», — деб жавоб берган бадиий гуруҳ.

Шунингдек, гуруҳ ўз саҳифасида монолит ясаётгани акс этган суратни ҳам қолдирган эди.

Фото: Instagram/ @themostfamousartist

Аввалроқ AҚШ штатларидан биридаги чўлда 3 метрли номаълум монолит топилгани ҳақида хабар берилган эди. Шундан сўнг Руминиядаги шаҳарларнинг биридан ҳам учбурчаксимон монолит топилган.

Шунингдек, Калифорнияда оғирлиги 90 килограмм бўлган учинчи монолит топилгани маълум қилинган. Таъкидланишича, уни 2 декабрь куни маҳалий аҳоли вакили Гари Лёнс топган эди. Шундай монолитлардан яна бири 7 декабрь куни Буюк Британиядаги оролдан топилган. Унинг кўзгуга ўхшаш экани таъкидланган.