Ўзбекистонда телефонда тасвирга олинган йўл қоидабузарликларига ҳам жарима қўлланилади
Ўзбекистонда 2021 йил 1 январдан бошлаб телефон орқали тасвирга олинган йўл қоидабузарликлари ҳам жарима қўлланилади. Бу ҳақда ЎзА хабар берди.
![](https://teznews.uz/wp-content/uploads/2020/11/rerere.jpg)
Фото: «top-depo»
Хабарга кўра, ҳукуматнинг 2020 йил 11 ноябрдаги қарори билан йўл ҳаракати хавфсизлиги соҳасидаги ҳуқуқбузарликларга қарши курашишга оид амалдаги тартибга ўзгариш киритилди. 2021 йил 1 январдан бошлаб телефон ҳамда тасвирга олиш техника воситалари орқали тасвирга олинган ҳуқуқбузарликлар фотовидеофиксация қуриламаси орқали қайд этилган видеоёзувларга тенглаштирилади. Шунингдек, қоидабузарга Маъмурий жавобгарлик тўғрисидаги кодексда белгиланган тартибда чора кўрилиши айтилган.
Айни вақтга қадар фақат видеорегистраторда тасвирга туширилиб, юборилган тасвирларгина кўриб чиқилар, лекин бошқа видеотехникалар, хусусан, мобиль телефонларда олинган видеолар жарима қўллаш учун асос бўла олмас эди.
Маълумот ўрнида, фуқаролар ҳуқуқбузарлик тасвирга туширилган видеоларни ejarima.uz сайти орқали ваколатли органга юборишлари мумкин.
Аввалроқ Фарғонада ўрнатилган йўл ҳаракати қоидабузарликларини аниқловчи фотовидеофиксация қурилмалари 2 ноябрдан ишга туширилгани, Шаҳрихондаги 76 та маҳаллага замонавий кузатув камералари ўрнатилгани ҳақида хабар берилган эди.
Шунингдек, Ғиждувоннинг айрим ҳудудларига 2021 йилда 4,4 миллиард сўмлик қўзғалмас радарлар ўрнатилиши маълум қилинган.