Andijonda 600 gektar yer maydoni bog‘dorchilikka qiziqqan yoshlarga ajratilishi belgilandi
Andijon viloyati Ulug‘nor tumanida 600 gektar yer maydoni andijonlik yigit-qizlarga ajratilishi belgilandi. Bu haqda viloyat hokimligi matbuot xizmati xabar berdi.
Ta’kidlanishicha, viloyat hokimi Shuhratbek Abdurahmonov tashabbusi bilan Ulug‘nor tumanidagi 600 gektar yer maydoni bog‘dorchilikka qiziqqan yoshlarga 5—10 gektardan ajratilishi belgilangan.
“Hurmatli andijonlik yigit-qizlar, endi siz o‘zingiz istagandek bog‘dorchilik faoliyatini yo‘lga qo‘yishingiz mumkin. Aziz yoshlar, imkoniyatdan foydalanish vaqti keldi”, — deyiladi hokimlik xabarida.
Mazkur yo‘nalishdagi barcha savollarga +99 899 909 10 14 telefon raqami orqali batafsil javob olish mumkin.
Avvalroq Andijonda ehtiyojmand hamda tadbirkorlikka ishtiyoqi baland maktab bitiruvchilariga 20 mingta jo‘ja tarqatilishi xabar qilingandi.
Eslatib o‘tamiz, 9-iyul kuni Xovuskon ziyoratgohida pandemiya sharoitida ogʻir vaziyatda qolgan xotin-qizlarga 15 ta nogironlar aravachasi, 10 ta tikuv mashinasi, 17 ta minipech, 7 ta parkoʻrpa, 6 nafar ayolga 50 tadan parranda, bir nafar nogiron ayolning farzandiga noutbuk, bir nafar ayolga esa kir yuvish mashinasi taqdim etilgani haqda xabar berilgandi.