Фарғонада таэквондо бўйича Ўзбекистон чемпиони мотоцикл ўғирлади
Фарғона вилояти Ўзбекистон туманида 2 сентябрь куни фуқаро Ж. жарима майдончасида сақланаётган мотоциклни олиб қочган. Бу ҳақда ЎзA хабар берди.
Таъкидланишича, у таэквондо WTF бўйича Ўзбекистон чемпиони ва Осиё чемпионати совриндори бўлган. Фуқаро Ж. имтиёз асосида 2020 йил Ўзбекистон Миллий университетига қабул қилинган.
Воқеа тафсилотларига кўра, фуқаро Ж. 2 сентябрь куни соат 02:00 да «JAWA» русумли мотоциклни ўғирлаган. Йўлда кетаётганда қилган ишидан афсусланиб, ўзи яшайдиган маҳалла профилактика инспекторининг телефон рақамига қўнғироқ қилиб, жарима майдонидан мотоцикл ўғирлаб чиққанини айтган ва айбини бўйнига олган.
Бироздан сўнг етиб келган профилактика инспектори тегишли ҳужжатларни расмийлаштирган. Оқибатда мотоцикл жарима майдончасига қайтарилиб, Ж. қамоққа олинган. Суд мажлисида сўралганда Ж. мотоцикл минишга жуда қизиққани сабабли ушбу мотоциклни ўғирлаб чиққанини, уни шу куни миниб, кейин яна жойига олиб бориб қўймоқчи бўлганини билдирган.
Мотоцикл эгаси эса суддан арзимаган нархдаги мотоциклини деб Ж.нинг келажагини барбод қилмасликни, агар у озодликдан маҳрум қилинадиган бўлса, ўша мотоциклини ёқиб юборишини, Ж. содир этган жиноят натижасида ҳеч қандай моддий зарар кўрмагани, уни кечирганини айтиб, озодликдан маҳрум қилиш билан боғлиқ бўлмаган енгилроқ жазо тайинлашни сўраган.
Маълум бўлишича, Ж. ўзининг жиноий ҳаракатлари билан Жиноят кодексининг 267-моддаси 2-қисми «г» бандида кўрсатилган жиноятни қасддан содир этган. У Жиноят кодексида белгиланган модда санкцияси доирасида 10 йилдан 15 йилгача озодлиги маҳрум қилиниши мумкин эди.
Лекин судда Ж.га жазо тайинлашда содир этилган жиноятнинг хусусияти жабрланувчига зарар етказилмагани, унинг Ўзбекистон Миллий университети талабаси экани, спортнинг таэквондо WTF тури бўйича эришган ютуқлари, айбини бўйнига олиш тўғрисида арз ва пушаймонлигини ҳисобга олинган.
Ёшлар иттифоқи Фарғона вилоят кенгаши томонидан берилган ижобий тавсифномани ҳисобга олиб, суд Жиноят кодексининг 57-моддасини қўллаб, модда санкциясида назарда тутилмаган озодликни чеклаш жазоси тайинлашни, Ж.га кеч соат 21:00 дан эрталаб соат 6:00 гача яшаш жойидан чиқмаслик, назорат қилувчи органнинг розилигисиз яшаш ва ўқиш жойини ўзгартирмаслик каби тақиқларни юклаб, суд залининг ўзида қамоқдан озод қилинган.
Aввалроқ Ёзёвонда «Восход 3М» мотоциклини ўғирлаган шахс ушлангани ҳақида хабар берилганди. Шунингдек, Фарғонада «ИЖ» русумли мотоцикллар тўқнашиши оқибатида вояга етмаган фуқаро вафот этгани хабар қилинган.
