Олий Мажлис депутатлари такси ҳайдовчиларидан лицензия талаб қилмаслик таклифини берди

Олий Мажлис депутатлари мамлакатда такси хизматини кўрсатаётган тадбиркорларга ўз фаолиятларини қонуний амалга оширишларида енгиллик яратиш мақсадида ҳайдовчиларда лицензия талаб қилмаслик таклифини берди.

Фото: «Tez News»

Олий Мажлис Қонунчилик палатасининг Инновацион ривожланиш, ахборот сиёсати ва ахборот технологиялари масалалари қўмитаси томонидан 19 январь куни «Лицензиялаш, рухсат бериш ва хабардор этиш тартиб-таомиллари тўғрисида»ги қонун лойиҳасини иккинчи ўқишга тайёрлашга бағишланган фракциялараро мунозара ўтказилди. Тадбирда шахсий автотранспортидан фойдаланган ҳолда йўловчи ташиш хизматини кўрсатиш орқали фаолият юритаётганлар масаласига ҳам эътибор қаратилган.

Бунга кўра, амалга оширилиши учун лицензия талаб қилинадиган фаолият туридан чиқариб, ваколатли органларни хабардор қилиш тартибида амалга ошириладиган фаолият турлари рўйхатига киритишни, яъни такси хизматини кўрсатаётган тадбиркорларга ўз фаолиятларини қонуний амалга оширишларида енгиллик яратиш айтилган.

Ушбу фаолият турини бир рўйхатдан иккинчи рўйхатга олиниши ҳайдовчиларга йўловчиларни шаҳар, шаҳар атрофида ва шаҳарлараро енгил автомобилларда ташиш учун рухсатнома олиш жараёнини енгиллаштиради ва тўлов суммасини адолатли белгиланишига олиб келади.

Таъкидланишича, лицензиялаш, рухсат бериш ва хабардор этиш тартиб-таомиллари рўйхатига нотариал идоралар ва уй боғчалари киритилмагани ҳам депутатларнинг норозилигига сабаб бўлган.

«Уй боғчалари билан шуғулланиш қайсидир маънода ёш болалар учун жавобгарлик масъулиятини олиши лозим. Шундай таклифлардан яна бири бу лицензияни алоҳида филиалларга қўлланмаслигидир. Бу турдаги енгиллик айрим «ишбилармонлар» учун қонунни айланиб ўтишларига имкон бериши мумкин. Яъни лицензия олмай туриб бирор бир катта юридик шахс билан ўзаро тил бириктириб, ўзини катта юридик шахснинг бир филиали сифатида кўрсатиши мумкин», — деган ЎзХДП фракцияси аъзоси Шоҳиста Турғунова.

Маълум қилинишича, ушбу тадбирда билдирилган таклиф ва фикр-мулоҳазалар қонун лойиҳасини такомиллаштириш жараёнида кўриб чиқилади.

Аввалроқ Ўзбекистон чегараси орқали автомобиль ўтказиш пунктларида кўрсатиладиган пулли хизматлар рўйхати белгилангани ва Тошкентда тезюрар автобуслар қайси йўналишларда ҳаракатланиши ҳақида хабар берилганди.