Янгиерда ҳокимиятдаги танишлари орқали намунали уй ва 10 сотих ер олиб беришни айтиб, 2500 доллар олган сирдарёлик эркак ушланди
Сирдарё вилояти Янгиер шаҳрида ҳокимият, банк ва кадастр ташкилотларидаги танишлари орқали намунали уй ва 10 сотих ер олиб беришни айтиб, 2500 доллар олган эркак қўлга олинди.
Хабарга кўра, Янгиер шаҳридаги «Антилюкс» масъулияти чекланган жамиятда иш юритувчи вазифасида фаолият юритувчи шахс ҳокимият, банк ва кадастр ташкилотларида ишловчи танишлари орқали Янгиер шаҳрида яшовчи фуқарога имтиёзли равишда наъмунали уй олиб беришни ваъда қилган. Бундан ташқари, у хусусий боғча қуриш учун 10 сотих ер майдони ажратишда амалий ёрдам кўрсатишни ҳам айтган.
Иш бошқарувчи ушбу ишлари эвазига 2500 доллар олган вақтида ашёвий далиллар билан ушланган. Маълумот учун, қўлга олинган шахс 1979 йил Сирдарё вилоятида туғилган. Ҳозирда мазкур ҳолат юзасидан жиноят ишлари қўзғатилиб, тергов ҳаракатлари олиб борилмоқда.
Бундан аввал Фарғона шаҳрида пойтахтдан уй олиб беришини айтиб, эркакни 20 минг долларга «ухлатган» одам ва Қўрғонтепада салкам 11 тонна кўмир ўғирлаган 3 нафар эркак қўлга олингани ҳақида хабар қилинган эди. Шунингдек, Наманганда 9,5 минг долларга уй олиб, пулини бермасдан, бошқасига сотиб юборган эркакка жиноий иш очилгани ҳамда Қувада нархи салкам 2,5 миллион сўмлик велосипедни ўғирлаган эркак қўлга олингани маълум қилинганди.
