Фото: Getty Images
Маълумотларга кўра, дастлаб у АҚШ Олий суди раиси Жон Робертс гувоҳлигида қасамёд қилган: «Мен, Жозеф Робинет Байден, тантанали равишда Америка Қўшма Штатлари президенти вазифаларини сидқидилдан бажаришга ва Америка Қўшма Штатлари Конституциясини қўлимдан келганича сақлашга ва ҳимоя қилишга қасамёд қиламан. Ва Худо менга ёрдам беради».
«Бугун — Америка куни. Бугун — демократия куни. Демократиянинг қанчалик қадрли эканини билиб олдик. Ушбу соатларда, дўстлар, демократия тўлиқ ғалаба қозонди», – деди Байден.
Нутқ давомида Байден АҚШ аҳолиси оқ танлилар устунлигига қарши туриши кераклигини айтган. Қайд этилишича, Байден инаугурация пайтида бу ҳақда сўзлаган биринчи президент бўлган.
Байден, шунингдек, тўрт йиллик президент Дональд Трампдан кейин халқни бирлашишга чақирди. «Бирлик – бу олдинга йўл», – деди президент.
Байденнинг айтишича, унинг бирлашиш ҳақидаги баъзи сўзлари бемаъни хаёллардек туюлиши мумкин, аммо америкаликларни иккига ажратган кучлар ҳақиқатан мавжуд. Байден коронавирус пандемиясига ҳам тўхталиб ўтган. Унинг таъкидлашича, америкаликлар қийин вақтга, синовлар даврига дуч келмоқда. Президент АҚШ аҳолисини пандемия билан юзма-юз туришга чақирди ва халқ биргаликда буни енгишини таъкидлади.
Маълумотларга кўра, Байден 21 дақиқа давомида нутқ сўзлаган. Таққослаш учун, Дональд Трампнинг 2017 йилдаги нутқи 17 дақиқа давом этган бўлса, Обаманинг 2009 ва 2013 йилдаги чиқишлари 19 дақиқа давом этган.
Аввалроқ АҚШда 70 йиллик анъана бузилиб, Мелания Трамп Байденнинг рафиқасини Оқ уйга таклиф қилишдан бош тортгани ҳақида хабар берилган эди.
