Qoraqalpog‘iston sobiq prokurori Hakimbay Halimov koronavirusdan vafot etdi
O‘zbekiston bosh prokurorining sobiq o‘rinbosari, Qoraqalpog‘iston sobiq prokurori Hakimbay Halimov vafot etdi. Hakimbay Halimovda bir necha kun avval koronavirus aniqlangan.
Ma’lum qilinishicha, 1954-yilda tug‘ilgan Hakimbay Halimov Qoraqalpog‘iston prokuraturasida bo‘lim boshlig‘i lavozimida ishlagan va general-mayor unvoniga ega bo‘lgan. Hakimbay Halimovda bir necha kun oldin koronavirus aniqlangan va 22-iyul kuni vafot etgan. Sog‘liqni saqlash vazirligi prokurorning vafoti bo‘yicha hozircha axborot bermagan.
“Bosh prokuratura rahbariyati va jamoasi Qoraqalpog‘iston Respublikasi prokuraturasi organlarida xizmat qilgan 3-darajali Davlat adliya maslahatchisi Halimov Hakimbay Ashirovichning vafoti munosabati bilan marhumning qarindosh va yaqinlariga chuqur ta’ziya izhor etadi”, — deyiladi Bosh prokuratura xabarida.
Avvalroq Ichki ishlar vazirligi Sergeli IIO FMB podpolkovnigi Abdulaziz Toshev 12-iyul kuni vafot etganini, uning oʻlimiga koronavirusdan kasallangani sabab boʻlganini ma’lum qilgandi.
Keyinchalik 13- va 14-iyul kunlari Toshkent shahar IIBB mayori va IIV podpolkovnigi koronavirus infeksiyasi asoratlari oqibatida vafot etgani ma’lum bo‘lgan, keyinroq ushbu o‘lim holatlari Sog‘liqni saqlash vazirligi tomonidan tasdiqlangan edi.