Тошкентда қизларни 1000 доллар эвазига Туркияга фоҳишаликка юбораётган аёл ушланди (видео)
Тошкентда 1000 доллар эвазига четга фоҳиша етказиб берувчи аёл қўлга олинди. Бу ҳақда «Qalampir.uz» хабар қилди.
Хабарга кўра, 12 сентябрда Дилфуза исмли шахс Тошкент шаҳар ички ишлар бошқармасига мурожаат қилиб, Шаҳина исмли таниши уни Туркияга фоҳишалик қилишга юбораётганини маълум қилган.
Олиб борилган суриштирув натижасида ўзини Шаҳина деб таништирган шахс аслида 1990 йилда Тошкент вилоятида туғилган Зокирова Шойиста бўлиб чиққани ва у Дилфузани 14 сентябрь куни Туркиянинг Истанбул шаҳрига юбораётгани аниқланган.
Зокирова Шойиста яна уч нафар қизни Истанбулга фоҳишалик қилиш учун юбормоқчи бўлганида қўлга олинган. У қилган ишидан пушаймонлигини билдирган.
Маълум бўлишича, Дилфуза исмли фуқаро моддий томондан қийналгани сабабли Туркияга фоҳишалик қилиш учун кетишга рози бўлган.
Қайд этилишича, барча йўл харажатларини Ўзбекистонда Шойиста қоплаган. Туркияда эса бошқа бир фуқаро бўлган ва қолган харажатларни ўша шахс тўлаган. Бунинг эвазига қизларга фоҳишалик билан 500 доллар топиб бериш мажбурияти юклатилган. Ҳозирда Туркиянинг тегишли идоралари унинг шахсини аниқлаш ишларини олиб боряпти.
«Шаҳинага 500 долларни қанча муддатда топиб бераман десам, ҳаракатингизга боғлиқ. Рози бўлсангиз, мен сизга билет қилдираман деб жавоб берди.
Шаҳина тезроқ сизларни юборсам, аэропортдан кутиб олгандан кейин 1000 доллар пул беради менга. Юзимни пластик операция қилдириб олардим деди. Демак, сиз 1000 доллар пул оларкансиз-да жўнатганингизга десам, гапни бошқа ёққа буриб юборди.
Сизларга мурожаат қилишимга сабаб маҳалламда битта қизнинг ўлиги келди. Яна биттаси ОИТС бўлиб даволаняпти. Яна мени шубҳалантирган ҳолат Шаҳина четга ўзи бормасдан бизни жўнатаётгани бўлди», — дейди мурожаатчи Дилфуза.
Ҳозирда ҳолат юзасидан Шойистага нисбатан Жиноят кодексининг 135-моддаси (Одам савдоси) 1-қисми «е» банди билан жиноий иш қўзғатилган.
Аввалроқ Наманганда уйида фоҳишахона сақлаган аёл қўлга олингани, Қўқонда уйида фоҳишахона ташкил этган шахс ушлангани ҳақида хабар берилганди.
