Учкўприкда 120 ўринли мактаб янги биноси фойдаланишга топширилди (фото)
Фарғона вилояти Учкўприк туманида 120 ўринли 16-мактабнинг янги 2 қаватли биноси фойдаланишга топширилди. Бу ҳақда туман ҳокимлиги ахборот хизмати хабар берди.
![](https://teznews.uz/wp-content/uploads/2020/10/11-163.jpg)
Фото: Учкўприк туман ҳокимлиги ахборот хизмати
Маълум қилинишича, 23 октябрь, жума куни мазкур мактаб биноси фойдаланишга топширилган. Тадбирда туман ҳокими, мактаб кузатув кенгаши вакиллари ва ота-оналар иштирок этган.
![](https://teznews.uz/wp-content/uploads/2020/10/13-74.jpg)
Фото: Учкўприк туман ҳокимлиги ахборот хизмати
Таъкидланишича, мактабнинг 240 ўринга мўлжалланган асосий биноси 2007 йилда қурилган. Мактабда 461 нафар ўқувчи икки навбатда ўқиётгани қайд этилган. Қайд этилишича, мактабда 2019-2020 ўқув йилига келиб ўқувчилар сони белгиланган меъёрдан 2 карра кўпроқни ташкил этган. Шу сабабдан 2020 йил инвестиция дастури асосида мазкур таълим масканида 120 ўқувчи ўрнига мўлжалланган янги бино қурилган.
![](https://teznews.uz/wp-content/uploads/2020/10/14-59.jpg)
Фото: Учкўприк туман ҳокимлиги ахборот хизмати
Хабарга кўра, мазкур бинонинг қурилиш ишларига дастур асосида қарийб 1 миллиард сўм маблағ сарфланган.
![](https://teznews.uz/wp-content/uploads/2020/10/15-44.jpg)
Фото: Учкўприк туман ҳокимлиги ахборот хизмати
Бундан аввал Олтиариқда салкам 4 миллиард сўмга таъмирланган мактаб ва Булунғурда 2 миллиард сўмга таъмирланган боғча фойдаланишга топширилгани ҳақида хабар қилинган эди. Кейинчалик Чустда 4,5 миллиард сўмга таъмирланган мактаб ҳамда Бағдодда 420 ўринга мўлжалланган мактаб биноси фойдаланишга топширилгани маълум қилинганди.