Наманганлик йигит бир нечта вазифани бажарувчи трактор яратди (фото)
Наманган вилояти Чортоқ туманининг «Оромгоҳ» маҳалласида яшовчи ўрта мактабни тамомлаган Фарҳод Алимбоев бир неча вазифаларни бажарадиган трактор ихтиро қилди, деб хабар берди ЎзА.
Фото: ЎзА
Хабарда айтилишича, қишлоқ шароитига мос келадиган тракторнинг вазни 2 тонна 300 килограмм бўлиб, пропан газида юради. Ушбу кичик техникада бир нечта вазифани бажарса бўлади. Хусусан, ундан йўлларни текислашда фойдаланса бўлади, 1 тоннагача бўлган юкни кўтаради. Қовушлари алмаштирилса, асфальтни текислайди, шағал ва цементни ўзи ковушига олиб аралаштиради ва 2,5 метр баландликка кўтариб, тайёр опалубкага қуйиб беради.
Фото: ЎзА
«Ёшлигимдан устачилик, темирлар билан ишлашга қизиқаман. Тракторлар ясашни тўрт йил олдин бошланганман. Экскаватор, юк ортадиган тракторлар қиммат бўлгани учун ушбу транспорт воситаларини ўзим ясаб кўришни мақсад қилганман», — дейди Фарҳод Алимбоев.
Фото: ЎзА
Ихтирочининг сўзларига кўра, тракторнинг контейнер темирлари, рамаларини бозордан сотиб олган. Швеллер, дискаларини эса ўзи ясаган. Мотори эса «ВАЗ-2106» автомашинадан олиб қўйилган.
«Айни пайтда ижарага олинган кичикроқ устахонада фаолият юритяпман. Агар давлатимиз томонидан менга ишонч билдирилиб, ихтиро қилишим учун жой ва маблағ ажратилса мен қишлоғимизнинг 100 га яқин ишсиз ёшларнинг бандлигини таъминлаган бўлар эдим», — дейди Фарҳод Алимбоев.
Аввалроқ Ромитанлик ўқувчи музлаткичли велосипед ихтиро қилгани ҳақида хабар берилганди. Шунингдек, НамДУ талабалари ёд ва темир моддаси ўрнини босадиган цукатлар тайёрлаш технологиясини ишлаб чиққани маълум қилинганди.
