YouTube Трампнинг каналига қўйилган тақиқни узайтирди

YouTube видеохостинги АҚШнинг собиқ президенти Дональд Трампнинг каналига қўйилган тақиқни узайтирди. Бу ҳақда 26 январь, сешанба куни «Politico» газетаси YouTube вакилига таяниб хабар берди.

Фото: «Reuters»

«Содир бўлиши мумкин бўлган зўравонлик ҳаракатлари сабабли Дональд Трампнинг каналида чекловлар сақланиб қолмоқда. Биз воқеаларни диққат билан кузатмоқдамиз», дейилади компания хабарида. Нашр маълумотларига кўра, Трампнинг шахсий адвокати Рудольф Жулиан ҳам чекловга тушиб қолган, энди у платформада пул ишлай олмайди.

Twitter унинг тарафдорлари Вашингтондаги Капитолий биносига бостириб киргандан сўнг Трампни доимий равишда блоклаб қўйган биринчи ижтимоий тармоқ бўлганди. Компания бу қарор «ўравонликни янада қўзғатиш хавфи туфайли қабул қилинганлигини тушунтирган.

Шундан кейин Трампни блокировка қилиш тўғрисида Facebook, Snapchat, Twich қарор қабул қилган. Кейинчалик уларга YouTube ҳам қўшилган. Компания дастлаб Трампни 12 январь куни Капитолийда Трамп тарафдорларининг қўзғолонидан кейин яна зўравонлик пайдо бўлишидан хавотирланиб блокировка қилганди.

Компаниянинг таъкидлашича, яқинда президентнинг каналида жойлаштирилган видео «зўравонликни қўзғаган» ва олиб ташланган. Аммо YouTube қайси видео канални блоклашга сабаб бўлганига аниқлик киритмаган. Энди Трампнинг YouTube’даги каналига янги видеоларни юклаш ёки тўғридан-тўғри трансляция қилиш мумкин эмас. Илгари юкланган видеолар остида изоҳ қолдириш ҳам ўчириб қўйилган.