БМТ бош котиби «Спутник V» вакцинасининг пандемияга қарши курашдаги ўрнини баҳолади

Бирлашган Миллатлар Ташкилоти бош котиби Антониу Гутерриш Россиянинг коронавирусга қарши «Спутник V» вакцинаси коронавирус тарқалишига қарши курашда муҳим роль ўйнашини маълум қилди. Бу ҳақда у «ТАСС»га берган интервьюсида айтиб ўтган.

Фото: «Accosiated Press»

Унинг сўзларига кўра, «Спутник V» вакцинаси пандемияга қарши курашда муҳим роль ўйнаши мумкин, шунингдек, БМТ миссияларида ишлатилиши мумкин. Бунинг учун у ЖССТ томонидан сертификатланган бўлиши керак.

«Биз Россия вакцинаси ушбу курашда жуда муҳим роль ўйнаши мумкинлигига ишонамиз. Уни БМТнинг ваколатхоналарида ишлатиш мумкин, бу ерда биз ходимларимиз учун ҳам, маҳаллий аҳоли учун ҳам вакциналарга муҳтожмиз», — дея тушунтирди Гутерриш.

Унинг сўзларига кўра, БМТ фақатгина Жаҳон соғлиқни сақлаш ташкилоти томонидан тасдиқланган процедурадан ўтган вакциналардан фойдаланиши мумкин. «Ҳозирда Россия ва ЖССТ расмийлари ўртасида алоқалар мавжудлигини биламан, умид қиламанки, бу алоқалар рус вакцинаси ЖССТ томонидан тезроқ тан олиниши ёки сертификатланишига ёрдам беради», — дейди у. Маълум қилинишича, мурожаатни кўриб чиқишнинг иккинчи босқичи давом этмоқда.

Аввалроқ коронавирусга қарши «Спутник V» вакцинаси йўриқномасида жиддий огоҳлантириш пайдо бўлгани ҳақида хабар берилган эди. Шунингдек, ўзбекистонликлар Россияга киришда «Спутник V» вакцинаси билан эмланаётгани ҳақидаги хабарларга изоҳ берилган.