Европа Иттифоқида «AstraZeneca» вакцинаси қўллаш учун маъқулланди

Европа дори воситалари агентлиги (EMA) 28 январь, пайшанба куни Европа Иттифоқи мамлакатларида инглиз-швед компанияси — «AstraZeneca»нинг коронавирусга қарши вакцинасидан фойдаланишга рухсат берди. Бу ҳақда «Deutsche welle» хабар берди.

Фото: «Getty Images»

Таъкидланишича, «AstraZeneca» Европа Иттифоқида тасдиқланган учинчи вакцина бўлди. Бунгача Ҳамдўстлик Германиянинг «BioNTech» компанияси ва унинг ҳамкори «Pfizer» вакциналари, шунингдек, АҚШнинг «Moderna» препаратидан фойдаланишга рухсат берган.

Таъкидланишича, «AstraZeneca» вакцинаси бошқа иккита ишлаб чиқарувчининг препаратларига қараганда арзонроқ ва оддий сақлаш шароитларига эга. Аммо вакцинанинг 65 ёшдан ошган одамлар учун самарадорлиги тўғрисида маълумотлар етарли эмас. Германиянинг Роберт Кох институтидаги доимий эмлаш комиссияси аллақачон «AstraZeneca» вакцинасини фақат 18 ёшдан 64 ёшгача бўлган одамлар орасида қўллаш кераклигини айтган. Бироқ «AstraZeneca» институт хулосаларини танқид қилган.

Аввалроқ Буюк Британия дунёда биринчи бўлиб коронавирусга қарши «AstraZeneca» вакцинасини қўллашни бошлагани ҳақида хабар берилган эди.