Навоийда аёлни «шантаж» қилган «сохта» ички ишлар ходими ушланди

Навоий вилоятида эркак ўзини ички ишлар ходими деб таништириб, аёлни шахсий суратларини тарқатиш билан таҳдид қилди. Бу ҳақда вилоят ИИБ хабар берди.

Хусусан, сурхондарёлик 25 ёшли фуқаро навоийлик аёл билан ижтимоий тармоқ орқали танишади ва ўзаро ишқий муносабат ўрнатади. Шундан сўнг, эркак аёлнинг ишончига киради ва унинг ярим яланғоч расмлари ва видеоларини қолга киритади.

Натижада, улар ўрталарида ўзаро низо юзага келгач, ўзини ИИБ ходими деб таништирган эркак аёлнинг шахсий сурати ва видеоларини ижтимоий тармоқларда тарқатиш билан таҳдид қилиб, пул сўрайди.

Аввалига қариндошларимдан икки юз эллик минг сўмдан бир ярим миллион сўмгача қарз олиб, унинг талабларини қоплай бошладим. Аммо, эркак кунора пул сўраб, яна «шантаж» қилаверди. Охири ички ишлар органларига мурожаат қилишга мажбур бўлдим, — деган аёл тергов жараёнларида.

Мазкур ҳолат юзасидан тезкор тадбир ташкил этилиб, товламачиликда гумон қилинган шахс қўлга олинган.

Мен бу хатти-ҳаракатларимни ҳеч ким билмайди ва мени ҳеч ким тополмайди, деб ўйлагандим. Қилган ишимдан пушаймонман, — дея айбига иқрор бўлган эркак.

Айни пайтда айбдорнинг қилмишига нисбатан Жиноят кодексининг 165-моддаси асосида тергов ҳаракатлари олиб борилмоқда.