Ўзбекистон БМТнинг Исроилдан Фаластин ерларини тарк этишини талаб қилувчи резолюциясини қўллаб-қувватлади
БМТ Бош ассамблеяси Исроилдан Халқаро суд қарорини бажариши ва босиб олинган Фаластин ҳудудини бир йил ичида тарк этишни талаб қилувчи резолюция лойиҳасини қабул қилди, деб ёзади «ТАСС».
Резолюцияни 124 давлат, жумладан Ўзбекистон, Қозоғистон, Россия, Бельгия, Бразилия, Қатар, Хитой ва Франция қўллаб-қувватлади. Шунингдек 14 давлат (Исроил, АҚШ, Венгрия ва бошқалар) қарши чиқди, яна 43 давлат овоз беришда бетараф қолди.
Қайд этилишича, резолюцияни қабул қилиш учун овозларнинг учдан икки қисми талаб қилинган. Ушбу резолюция Фаластиннинг БМТ Бош Ассамблеясида ҳуқуқлари кенгайтирилганидан кейин овоз беришга таклиф қилинган биринчи ҳужжат бўлди.
Тегишли қарор лойиҳаси 18 банддан иборат бўлиб, у Исроилнинг босиб олинган Фаластин ҳудудидаги барча ерларни зудлик билан тарк этишни талаб қилади. Шунингдек ушбу ҳужжат қабул қилинганидан кейин 12 ойдан кечиктирмай амалга оширилиши керак бўлади.
