Россияда украиналикларга ёрдам берган фаол 22 йилга озодликдан маҳрум этилди
Украинага гуманитар ёрдам кўрсатган ва одамларни уруш зонасидан эвакуация қилишда иштирок этган россиялик фаол 22 йиллик қамоқ жазосига ҳукм қилинди. Бу ҳақда Arab News нашри хабар берди.
Надин Гейслер (асл исми Надежда Россинская) 20 июнь куни Москва ҳарбий суди томонидан қамоққа ҳукм қилинди
Россинская «Гўзаллар армияси» номли гуруҳни бошқарган ва 2022–2023 йилларда Россия назорати остидаги Украина ҳудудларида 25 мингга яқин одамга ёрдам берган.
2024 йил февраль ойида у ҳибсга олинган. Кейинчалик Инстаграмъда Украинадаги «Азов» баталёнига хайрия қилишга чақирган пости учун унга давлатга хиёнат ва террорчилик фаолиятига кўмаклашиш айбловлари қўйилган. Гейслер бу айбловларни рад этган, адвокати эса пост муаллифи у эмаслигини билдирган.
Прокуратура Гейслер учун 27 йиллик жазо сўраган эди. «Медиазона» нашрига кўра, Гейслер суддан ўзини 27 йил ва бир кун муддатга қамашни сўраган – бу билан у 2023 йилда блогер ўлдирилишида гумон қилинган Даря Треповадан кўпроқ жазо олишини истаган. Трепова 2024 йилда энг узоқ қамоқ жазосига ҳукм қилинган аёл сифатида тарихга кирган эди.
Маълумот учун, Россияда 2022 йилда бошланган урушдан буён терроризм, жосуслик ва хорижий давлат билан ҳамкорлик айбловлари бўйича жиноий жавобгарлик кескин ошган.
