Тошкентда чиқинди хизматидан қарздорлар учун электр тўловига вақтинча чеклов қўйилди
Тошкентда чиқинди хизматидан қарздор 6 минг нафар абонентнинг электр тўловига вақтинча чеклов ўрнатилди. Бу ҳақда Чиқиндиларни бошқариш ва сиркуляр иқтисодиётни ривожлантириш агентлиги матбуот хизмати хабар берди.
Янги тартиб кўра, ҳар ойнинг 3-санасига қадар қарздор абонентлар тўғрисидаги маълумотлар Чиқиндиларни бошқариш ва циркульяр иқтисодиётни ривожлантириш агентлигининг «Тоза макон» биллинг электрон тизимидан «Ҳудудий электр тармоқлари» АЖнинг биллинг тизимига узатилмоқда.
Жумладан, жорий йилнинг 5-ноябрь куни Тошкент шаҳри бўйича чиқинди хизматларидан юзага келган қарийб 2 млрд 239 млн сўм дебитор қарздорлик учун жами 25 минг 121 та абонент хабарнома орқали огоҳлантирилган.
Ушбу огоҳлантириш юборилганидан кейин 5 (беш) кун ичида қарздорликни бартараф этмаган 6 минг та абонентнинг электр энергияси учун тўлов қилиш имкониятига бугундан вақтинча чеклов жорий этилди. Айни пайтда Тошкент шаҳри кесимида чиқинди хизматларидан жами 582 млн сўмдан ортиқ дебитор қарздорлик мавжуд, — дейилади хабарда.
Чеклов қарздорлик бартараф этилиши биланоқ дарҳол ечилиши маълум қилинди.
Қайд этилишича, ушбу тартиб 2025-йил 30-июнгача бўлган қарздорликларга татбиқ этилмайди. 2025-йилнинг 1-июльидан чиқинди хизматларидан шаклланган қарздорликлар учун жорий йилнинг 5-ноябридан бошлаб қўлланилган.
Мазкур тартиб жорий йилнинг декабрь ойидан бошлаб республиканинг қолган ҳудудларида ҳам жорий этилиши билдирилди.
