Наманганда жами 3,5 млн сўмлик тилла тақинчоқларни ўғирлаган 4 нафар аёл қўлга олинди

Наманганда 1,5 миллион ва 2 миллион сўмлик тилла зиракларни ўғирлаган 4 нафар аёл қўлга олинди. Бу ҳақда вилоят ИИБ ахборот хизмати хабар қилди.

Хабарга кўра, Наманган туманида яшовчи аёл 26 август куни ариза билан мурожаат қилиб, унда шу куни соат 10:00 да Наманган шаҳар «Чорсу» маҳалласида жойлашган «Чорсу деҳқон бозори» автошоҳбекати олдида 4 нафар нотаниш аёл қулоғида бўлган бир жуфт нархи 1,5 миллион сўмлик тилла зирагини кўриш учун сўраб олиб, очиқдан-очиқ талончилик йўли билан олиб, қочиб кетганликларини маълум қилиб, чора кўришни сўраган.

Фото: Наманган ИИБ Ахборот хизмати

Суриштирув ва қидирув ишлари давомида ушбу 4 нафар аёл шу куни соат 11:30 да «Чорсу деҳқон бозори»да Мингбулоқ туманида яшовчи яна бир аёлнинг қулоғида бўлган бир жуфт нархи 2 миллион сўмлик тилла зирагини очиқдан-очиқ талон-торож қилиб, олиб кетганлиги аниқланган.

Наманган шаҳар ички ишлар органлари фаолиятини мувофиқлаштириш бошқармаси 4-сонли ИИБ Жиноят қидирув бўлими вакили томонидан олиб борилган тезкор-қидирув ва суриштирув ҳаракатлари натижасида ушбу жиноятни содир этганларнинг шахси аниқланиб, улардан далилий ашё олинган.

Ҳозирда ушбу ҳолат бўйича 4 нафар аёлга нисбатан Наманган шаҳар ИИО ФМБ ҳузуридаги тергов бўлими томонидан Жиноят кодексининг 166-моддаси 3-қисми билан жиноят иши қўзғатилган.

Эслатиб ўтамиз, Риштонда 800 минг сўмлик қовун ва тарвузни талончилик йўли билан олиб қочган шахслар, Фарғонада аёлнинг сумкасини олиб қочган шахс қўлга олингани ҳамда Қўқонда таксида талончилик содир этган йуловчи қўлга олингани ҳақида хабар қилинганди.