ЖССТ коронавирусга қарши вакциналар қачондан етказиб берилишини маълум қилди
Жаҳон соғлиқни сақлаш ташкилоти бош илмий ходими Сумия Сваминатан 4 сентябрь, жума куни ўтказилган брифингда COVID-19’га қарши ҳар қандай вакцина халқаро даражада фойдаланилишидан аввал унинг хавфсизлиги ва самарадорлигини тасдиқловчи тўлиқ жараёндан ўтиши кераклигини айтди. Бу ҳақда «РИА Новости» хабар берди.
«Бирорта ҳам вакцина регуляторлар, ҳукуматлар ва ЖССТ унинг минимал хавфсизлик стандартларига жавоб беришига ишончи комил бўлмагунига қадар оммавий равишда тарқатилмаслиги керак», — дейди Сваминатан.
Унинг сўзларига кўра, маъқулланган вакциналарни илк бор етказиб бериш ишлари ЖССТнинг COVAX дастури орқали 2021 йилнинг ўрталарида бошланиши мумкин.
ЖССТ бош директори Тедрос Гебрейесус вакциналар миқдори чеклангани сабаб уни биринчи ўринда хавф даражаси юқори бўлган одамларга етказиб бериш кераклигини айтган.
У, шунингдек, COVAX дастури ЖССТ томонидан янги коронавирусга қарши вакцина билан мамлакатларни глобал миқёсда таъминлаш учун ташкил қилинганини эслатиб ўтган. Ҳозирги кунда унга 78 та мамлакат қўшилган. Айни пайтда ЖССТ портфелида коронавирусга қарши 9 та вакцина мавжуд экани, улардан 7 таси клиник синовлардан ўтаётгани айтилмоқда. Шунингдек, COVAX’ни яна 4 та препарат билан бойитиш бўйича музокаралар олиб борилмоқда.
Аввалроқ Ўзбекистон коронавирусга қарши эмлаш дастурига қўшилгани, Россияда коронавирусга қарши эмлаш 5 сентябрдан бошланиши хабар қилинган эди.
